Ամերիկյան Oracle կորպորացիան պատրաստ է զարգացնել Հայաստանում իր մասնաճյուղը: Այս մասին Երեւանում Oracle-ի ներկայացուցչության բացման ժամանակ հայտարարեց կորպորացիայի փոխնախագահ Իգոր Խալաթյանը:
«Այո, մենք բավական հեռուն գնացող ծրագրեր ունենք: Մենք թիմ ունենք, բայց այն բավականաչափ մեծ չէ: Այդ պատճառով մենք վարձում ենք մասնագետների եւ ուզում ենք, որ այդ մասին իմանան: Իհարկե, լավ մասնագետների՝ լավ աշխատավարձով: Բացի շախմատից, հայերը հայտնի են նաեւ որպես ծրագրավորման վարպետներ, այդ պատճառով կարծում եմ, որ որոնման հարցում խնդիրներ չեն առաջանա»,- նշեց Խալաթյանը:
Oracle ընկերության ԱՊՀ-ի Business Intelligence արտադրանքի վաճառքների գծով տնօրեն Սեմյոն Պոպովը լրագրողներին հայտարարեց, որ ընկերության տեղական մասնաճյուղը զարգացնելու է դեսքթոփ-շերինգի եւ քո-բրաուզինգի ուղղությանը, որը սկսել է Իգոր Խալաթյանի Livelook ընկերությունը, որն ավելի ուշ ձեռք է բերել Oracle-ը: Հետագայում դրան կավելանան նաեւ այլ խնդիրներ, որոնք լուծում են Oracle-ի ծրագրավորողներն ամբողջ աշխարհում:
Նրա խոսքով, Հայաստանն Oracle-ին գրավում է նաեւ որպես կորպորատիվ տվյալների բազայի եւ այլ արտադրանքի շուկա: «Մեզ գրավում են ե՛ւ շուկայի ծավալը, ե՛ւ դրա աճը: Բացի այդ, եթե մենք ձգտում ենք ներկայանալ ամբողջ աշխարհում, չենք կարող նաեւ այստեղ չլինել»,- հավելեց Պոպովը:
Ամերիկյան Oracle կորպորացիան համաշխարհային առաջարտարներից մեկն է տվյալների բազայի հիման վրա ծրագրային ապահովման մշակման եւ վաճառքի գործում: