LiveLook ընկերությունը ստեղծվել է որպես ամերիկյան սթարթ-ափ: Այս մասին NEWS.am-ի թղթակցի հետ զրույցում հայտարարեց Oracle կորպորացիայի փոխնախագահ Իգոր Խալաթյանը:
Խալաթյանը ծնվել է Երեւանում, ավելի ուշ փոխադրվել է ԱՄՆ եւ այնտեղ հիմնել LiveLook ընկերությունը: Նախ այդ ամենն արվում էր Ամերիկայում: «Հետո ես եկա Հայաստան՝ այստեղ մարդկանց տաղանդները տեսնելու: Եվ հաճելիորեն զարմացա՝ տեսնելով, որ այստեղ ընդլայնվելն իմաստ ունի»,- նշեց նա:
Խալաթյանը սիրում է շախմատում եւ ծրագրավորման մեջ հայերի տաղանդի մասին խոսակցությունները: Ամեն դեպքում, աշխատանքում նրա համար ազգությունը կարեւոր չէ: ԱՄՆ-ում ընկերության գլխամասային գրասենյակում հայեր գրեթե չկային: «Փոխարենը տղաներ կային Մոսկվայի ֆիզտեխինստիտուտից: Դե՝ նաեւ ամերիկացիներ»,- հավելեց նա:
Ընկերությունը սկզբում հաճախորդների հեռակա աջակցման համար լուծումներ էր մշակում (քո-բրաուզինգ, սքրին-շերինգ): «Այդ ուղղությանը մեզ մոտ գերակշռող էր, բայց մենք նաեւ զարգանում էինք: Ասենք՝ մարդիկ չեն ցանկանում, որպեսզի օպերատորը տեսնի իրենց անձնական տվյալները. օրինակ՝ PIN-կոդը: Այդ պատճառով մենք զարգանում էինք այն ուղղությամբ, որպեսզի դա անենք առանց հավելվածների ներբեռնման»,- հայտարարեց Խալաթյանը:
Oracle-ի կազմում LiveLook-ի թիմը շարունակելու է նախկին մշակումները, որոնցով էլ, ըստ էության, ուշադրություն են գրավել:
LiveLook-ը հիմնադրվել է 2007 թվականին, AT&T Bell Labs-ի նախկին աշխատակիցների թիմի կողմից: 2014 թվականի հունիսին Oracle-ը հայտարարեց LiveLook-ը ձեռք բերելու մասին (պաշտոնական համաձայնագիրը դեռեւս ուժի մեջ չի մտել): Ընկերության մշակումներն արդեն ներառված են Oracle-ի cloud-ծառայություններում: