Այս տարվա հուլիսին Շահումյանի շրջանով ԼՂՀ պետական սահմանը ապօրինաբար հատած ադրբեջանական հետախուզական-դիվերսիոն խմբի գործով դատավարության ժամանակ առաջիկա օրերին հարցաքննվելու է ավելի քան մեկ տարի Ադրբեջանում գերության մեջ գտնված եւ հոկտեմբերի 1-ի լույս 2-ի գիշերը Հայաստան վերադարձած հայ զինծառայող Հակոբ Ինջիղուլյանը:
Լեռնային Ղարաբաղի Հանրապետության առաջին ատյանի դատարանի Ստեփանակերտի նստավայրում տեղի ունեցած դատական նիստի ժամանակ դատախազը միջնորդել է հարցաքննել Ինջիղուլյանին, քանի որ դիվերսանտների մոտ առկա է Ադրբեջանում գերի ընկած պաշտպանության բանակի ժամկետային զինծառայող Հակոբ Ինջիղուլյանի հարցաքննության մանրամասներ: Դատավորը բավարարել է միջնորդությունը:
Ինչ վերաբերվում է դատավարությանը, ապա NEWS.am-ի թղթակցի հետ զրույցում Դիլհամ Ասկերովի փաստաբան Էրիկ Բեգլարյանը հայտնեց, որ այս պահին ուսումնասիրվում են իրեղեն ապացույցները՝ դիվերսանտների հագուստները, Սմբատ Ցականյանից գողացված հայկական զինվորական համազգեստը, տեսախցիկները, լիցքավորման սարքերը, հեռադիտակը:
«Զենքերի ուսումնասիրությանը դեռ չենք հասել»,- ասաց փաստաբանը:
Հիշեցնենք, որ որ պաշտպանության նախարարի մամուլի խոսնակ Արծրուն Հովհաննիսյանն ավելի վաղ հայտնել էր, որ առկա է համապատասխան տեսագրություն, որն ավելորդ անգամ հաստատում է ադրբեջանական քարոզչամեքենայի սին բնույթը. «Տեսագրությունն անմիջականորեն կապված է Ինջիղուլյանի նկատմամբ կատարված բռնություններին, դրանց միջոցով նրան իրականությանը չհամապատասխանող հայտարարություններ կատարելուն հարկադրմանը, ինչպես նաեւ իրականում հստակեցնում է, թե ովքեր են իբրեւ թե «իրենց հարազատների գերեզմաններին այցելած» ադրբեջանցի դիվերսանտները»:
Նշենք, որ գործի քննությունը սկսվել է հոկտեմբերի 27-ին: Հիշեցնենք, որ Դիլհամ Ասկերովին մեղադրանք է առաջադրվել Լեռնային Ղարաբաղի քրեական օրենսգրքի 7, իսկ նույն երկրի քաղաքացի Շահբազ Գուլիեւին ՝ 5 հոդվածների հատկանիշներով։ Նրանք մեղադրվում են ազգային ատելության շարժառիթներով մարդուն առեւանգելով սպանելու, կազմակերպված խմբի կողմից անչափահասի նկատմամբ զենքի գործադրմամբ բռնություն գործադրելու, լրտեսության, Ղարաբաղի պետական սահմանը կազմակերպված խմբի կողմից հատելու, հրազեն եւ ռազմամթերք կրելու մեջ։ Դիլհամ Ասկերովին նաեւ կազմակերպված խմբի կողմից ազգային ատելության շարժառիթով երկու անձանց սպանության փորձի մեղադրանք է առաջադրվել։
