Այսօր՝ դեկտեմբերի 12-ի վաղ առավոտյան մինչեւ աշխատանքային օրվա սկիզբը ոստիկանությունում արտահերթ խորհրդակցություն է հրավիրվել, որի վերաբերյալ NEWS.am-ին հաջողվեց որոշ մանրամասներ ճշտել:
ՀՀ ոստիկանապետ Վլադիմիր Գասպարյանը խորհրդակցություն է հրավիրել ղեկավար կազմի եւ բոլոր կարեւորագույն ստորաբաժանումների ներկայացուցիչների հետ եւ ուժեղացված ծառայության ռեժիմին անցնելու հրահանգներ տվել: Այս հրահանգները պայմանավորված են վերջին շրջանում մայրաքաղաքում տեղի ունեցած բռնության դեպքերով: Քննարկվել է նաեւ ՀԱԿ խմբակցության պատգամավոր Արամ Մանուկյանի դեմ հարձակման դեպքը:
Չի բացառվում, որ առաջիկայում մայրաքաղաքի փողոցները հեղեղվեն ոստիկաններով եւ իրավապահները խիստ հսկողության ռեժիմով ծառայություն իրականացնեն:
Հիշեցնենք, որ վերջին օրերին ծեծի են ենթարկվել ազատամարտիկներ Ռազմիկ Պետրոսյանը, Մանվել Եղիազարյանը, Սուրեն Սարգսյանը: Իսկ երեկ՝ դեկտեմբերի 11-ի երեկոյան, իրենց շենքի մուտքի մոտ անհայտ անձը հարձակվել է ՀԱԿ խմբակցության քարտուղար Արամ Մանուկյանի վրա եւ հարվածել նրան:
