«Հրանտ Դինք» հիմնադրամն ընդամենը թուրքական քարոզչությունն իրականացնողն է։ Այս մասին այսօր՝ դեկտեմբերի 13-ին, լրագրողների հետ զրույցում ասաց թուրքագետ Ռուբեն Մելքոնյանը։
«Հիանտ Դինքը հակասական կերպար է, բայց անձ է, որն ապրել է էվոլյուցիա եւ իր կյանքի վերջին վնասում էր ինչ-որ չափով թուրքական քարոզչությանը։ Իսկ հիմնադրամը որեւէ կապ չունի Հրանտ Դինքի անձի հետ։ Այստեղ մենք գործ ունենք գրանտային ծրագրի հետ, որը թուրքական քարոզչություն է իրականացնում եւ սպասարկում է Թուրքիայի շահերը։ Ինձ համար «Ակոս»-ի խմբագրության կազմը չի տարբերվում շարքային թուրքից։ Պետք է հասկանալ, որ Հայոց Ցեղասպանության 100-ամյակին ընդառաջ Թուրքիան նոր քարոզչություն է սկսելու, տարբեր որոգայթներ է լարելու մեր դեմ։ Չեն լինելու բացահայտ հակահայկական գործողություններ, ամեն ինչ արվելու է գրանտակեր հիմնադրամների շնորհիվ»,- ասաց Ռուբեն Մելքոնյանը։
Նրա խոսքով՝ «Հրանտ Դինք» հիմնադրամը Հայաստանից տարվա ընթացքում ուսանողներ է տանում Թուրքիա, որտեղ «չորս ամիս լվանում են հայ երիտասարդների ուղեղները»։
«Երեւանի պետական համալսարանը պաշտոնապես հայտարարել է, որ չի համագործակցելու այս գրանտակեր հիմնադրամի հետ»,- ավելացրեց նա։
Նշենք, որ Ջեմալ փաշայի թոռան՝ Հասան Ջեմալի «1915. Հայոց ցեղասպանություն» գրքի թարգմանիչ Ռուբեն Մելքոնյանը Հասան Ջեմալի հետ երեւանյան հանդիպման ժամանակ հայտարարել էր, որ «Հրանտ Դինքի» հիմնադրամը առանց իր հետ համաձայնեցնելու փոխել է տեքստը, խեղաթյուրել թարգմանությունը եւ գիրքը դարձել թուրքամետ: