Երբ առաջին անգամ բացահայտեցի, որ Ձմեռ պապ չկա, խորը հիասթափվեցի: Դա պատահաբար ստացվեց. երբ նախորդ օրն ավտոտնակում տեսա ամանորյա նվերս: Այս մասին NEWS.am-ի թղթակցի հետ զրույցում նշեց ՀՀ արդարադատության նախարար Հովհաննես Մանուկյանը:
Նախարարը շարունակել է NEWS.am-ի թղթակցի մտքերը, որը ներկայացնում ենք ստորեւ:
Ես սիրում եմ Հայկական Նոր տարին, որովհետեւ...
Միակ տոնն է, երբ ժպտում են անգամ ամենամռայլ հայերը:
Ձմեռ պապիկի նվերները բացելիս՝ միշտ մտքովս անցել է, որ...
Այս անգամ կախարդական փայտիկ կհանեմ, բայց սովորական նվերներ են եղել սովորական խանութներից:
Հիշում եմ, երբ առաջին անգամ բացահայտեցի, որ Ձմեռ պապ չկա...
Խորը հիասթափվեցի: Դա պատահաբար ստացվեց. երբ նախորդ օրն ավտոտնակում տեսա ամանորյա նվերս:
Երբ ժամացույցի սլաքը կանգնում է ուղիղ 12:00-ի վրա, հասկանում եմ, որ...
Տարիներն անցնում են շատ արագ ու կյանքը պետք է լիարժեք ապրել:
Նոր տարին սկսվում է այն ժամանակ...
Երբ վերջին աշխատանքային օրն ավարտվում է, վերջացնում ես ահռելի ծավալով գործերդ, կարգի ես բերում աշխատասեղանդ ու դուրս ես գալիս:
Հայկական Ամանորն անհնար է պատկերացնել...
Առանց դոլմայի եւ «ԴԵ ՄԵՆՔ ՎԵՐ ԿԱՑԱՆՔ, ԴԵՌ ՇԱՏ ՏԵՂԵՐ ՈՒՆԵՆՔ ԳՆԱԼՈՒ» արտահայտության:
Իմ Ամանորի սեղանին պետք է պարտադիր լինի...
Մորս պատրաստած սացիվին:
Երբ հարեւաններս «բոմբոներկաներով» մտնում են մեր տուն...
Ես այդ ժամանակ «քնած եմ»:
Ձմեռ պապիկից այս տարի խնդրելու եմ...
Ավելի շատ եռանդ ինձ համար եւ Ղարաբաղյան հարցի վերջնական լուծում Հայաստանի համար:
Աիդա Հովհաննիսյան