Երեւանի Նուբարաշեն թաղամասում հունիսի 1-ի գիշերը 22-ամյա Վանուշ Ալեքսանյանին դանակահարելու մեջ մեղադրվող եւ արդեն 6 ամիս հետախուզման մեջ գտնվող՝ Երեւանի փոխոստիկանապետ Վալերի Օսիպյանի եղորորդու՝ Սեդրակ Օսիպյանի գործով առկա է հեռախոսային խոսակցություն, որն ուղարկվել է փորձաքննության: Այս մասին NEWS.am-ի թղթակցի հետ զրույցում ասաց Օսիպյանի փաստաբան Կրմվել Գրիգորյանը:
«Հենց լինի փորձագետի եզրակացությունը, կասենք, թե հեռախոսային խոսակցության մասին է խոսքը, եւ ինչ ենք դրամով ցանկանում ապացուցել»,- ասաց փաստաբանը:
Մեր հարցին, թե արդյոք դա վերաբերվում է գործով վկա Սարգիս Հովհաննիսյանի մորը, փաստաբանը պատասխանեց. «Կամ մոր հետ է կապված, կամ էլ որդու»:
Նշենք, որ Սարգիս Հովհաննիսյանի մայրը՝ տիկին Սուսաննան, պնդում է, որ Վանուշ Ալեքսանյանին դանակահարել է Սեդրակը, սակայն վերջինիս հարազատները ցանկանում են գործը բարդել իր որդու վրա:
Ավելի վաղ NEWS.am-ը հայտնել էր, որ դեպքը տեղի է ունեցել 2014թ. հունիսի 1-ի գիշերը Նուբարաշենում: Վիճաբանությունից եւ ծեծկռտուքից հետո 22-ամյա Վանուշ Ալեքսանյանին տեղափոխել էին «Էրեբունի» բժշկական կենտրոն, որտեղ վերջինս վիրահատվել էր: Ըստ ոստիկանության՝ դանակահարողը Երեւանի փոխոստիկանապետ Վալերի Օսիպյանի եղբորորդին է՝ 22-ամյա Սեդրակ Օսիպյանը: Սեդրակ Օսիպյանին հունիսի 3-ին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Նա գտնվում է հետախուզման մեջ: