Նորքի ինֆեկցիոն հիվանդանոցից փախուստի դիմած եւ այժմ Վրաստանում գտնվող Սուրեն Վաչիկի Գաբրիելյանի մասով կկայանա դատական նիստ, որտեղ կորոշվի նրա ճակատագիրը: Այս մասին NEWS.am-ի թղթակցի հետ զրույցում ասաց Սուրեն Գաբրիելյանի փաստաբան Հակոբ Ճարոյանը:
Նա նշեց, որ դատական նիստին կորոշեն նրան Հայաստանին հանձնելու, հիվանդանոցից տեղափոխելու հարցը: Դրանից բացի՝ կքննարկվի նաեւ նրա՝ սահմանը ապօրինաբար անցնելու եւ Սուրեն Գաբրիելյանի մոտ հայտնաբերված զենքի հարցով տուգանքները: Խնդիրն այն է, որ որպես արցախյան ազատամարտին մասնակից՝ նա զենք է ունեցել, որը Հայաստանում համարվում է օրինական, բայց Վրաստանում՝ ապօրինի: Կալանավորի վիճակը շարունակում է մնալ ծանր, ինչի պատճառով դատական նիստերը չեն կայանում: :
Հակոբ Ճարոյանն ասաց, որ փախուստի դիմած կալանավորի գործից առանձնացված մասով՝ Արա Կիրակոսյանի եւ Մելիք Եսայանի դեմ հարուցված գործով հերթական դատական նիստը դեկտեմբերի 16-ին չի կայացել իր բացակայության պատճառով: Հերթական դատական նիստը նշանակված է դեկտեմբերի 18-ին:
Հիշեցնենք, որ Նորքի ինֆեկցիոն հիվանդանոցից փախուստի դիմած Սուրեն Վաչիկի Գաբրիելյանի մասով քրեական գործի քննությունը առանձնացվել է: Մյուս երկու մեղադրյալների՝ Արա Կիրակոսյանի եւ Մելիք Եսայանի մասով քրեական գործը ուղարկվել է դատարան, այն քննվում է Կենտրոն եւ Նորք-Մարաշ ընդհանուր իրավասության դատարանում դատավոր Մնացական Մարտիրոսյանի նախագահությամբ: Սուրեն Գաբրիելյանի մասով գործը առանձնացվել է, քանի որ նա գտնվում է փախուստի մեջ: Այս գործում խառնված են մի շարք պաշտոնյաններ մասնավորապես փաստաբան Ճարոյանը մտադիր է դատարան կանչել ԱԱԽ նախկին քարտուղար Արթուր Բաղդասարյանին, ԱԳ նախարարի տեղակալ Շավարշ Քոչարյանին: Հակոբ Ճարոյանն հայտնել է, թե Արթուր Բաղդասարյանի ուղարկած գրության հիման վրա հարուցված քրեական գործի արդյունքում ՀՀ երեք քաղաքացի է դատվում եւ Հայաստանի բանկերից մեկտ 8մլն եվրո է տվել ԻԻՀ դեսապանատնը, 1մլն էլ դեռ պետք է տա: Բանն այն է, որ այս գործի շրջանակներում կալանավորվածները մեղադրվում են պաշտոնական դիրքի չարաշահման, փողերի լվացման, խարդախության համար եւ կալանքի տակ գտնվող անձանցից մեկը՝ Արա Կիրակոսյանը, եղել է այդ բանկի կառավարիչ: Բանկը, ընդունելով, որ իր աշխատակիցը խախտում է արել, սակայն չսպասելով քննության ավարտին, դատավճռին, ԻԻՀ դեսպանատանը իր միջոցներից տվել է 8մլն եվրո, դեռ 1մլն-ն էլ պետք է տա: