Մայրաքաղաքի երթուղիները սպասարկող կազմակերպություններն իրենց գրավոր անհանգստությունն են հայտնել, որ հնարավոր է անկառավարելի լինի: Այս մասին NEWS.am-ի թղթակցի հետ զրույցում ասաց քաղաքապետարանի տրանսպորտի վարչության պետ Հենրիկ Նավասարդյանը՝ պատասխանելով հարցին, թե հնարավոր է ուղեվարձի սակագնի բարձրացում:
«Կա սակագնի հաշվիչ հանձնաժողով, որն էլ որոշում կկայացնի: Այս պահին ես որեւէ բան ասել չեմ կարող, ավտոգազալիցքավորման կետերում էլ գազի գինը ստաբիլ չէ դեռ: Ամեն դեպքում սպասարկող կազմակերպություններն իրենց անհնանգստությունը գրավոր հայտնել են, որ հնարավոր է անկառավարելի լինի»,- ասաց նա:
Մեր ճշտող հարցին՝ նշանակում է՝ չի՞ բացառվում ուղեվարձի թանկացումը, Հենրիկ Նավասարդյանը չպատասխանեց:
Նշենք, որ Երեւանի եւ մարզերի գազալցակայաններում գազի 1 խմ թանկացել է մոտ 50 դրամով։ Անհատ տաքսու վարորդներն արդեն բարձրաձայնում են, որ այսպես շարունակվի, իրենք տաքսու ուղեվարձի նվազագույնը կհասցնեն 1000 դրամի: Չի բացառվում, որ «գծատերերն» էլ նորից բարձրացնեն ուղեվարձի թանկացման հարցը:
