Երեւանի Մալաթիա-Սեբաստիա վարչական շրջանում՝ Անդրանիկի արձանի մոտ, այսօր՝ դեկտեմբերի 17-ին, առավոտից հավաքվել են երթուղային տաքսիների մի քանի տասնյակ վարորդներ, որոնք կանգնեցրել են մեքենաները եւ գործադուլ հայտարարել՝ բողոքելով գազի թանկացման դեմ:
«Մենք չենք պահանջում ուղեվարձը բարձրացնել: Թող միայն գազն էժանացնեն, մեզ ուրիշ բան պետք չի: Մարզերում գազն արժի 170 դրամ, իսկ Երեւանի տարածքում՝ 230 դրամ: Գազալցակայաններում ասում են՝ դոլարի թանկացման պատճառով է, բայց չենք հասկանում՝ մարզերում դոլարը չի թանկացել»,- NEWS.am-ին ասաց վարորդներից մեկը:
Վարորդների խոսքով՝ եթե մինչեւ գազի թանկանալն իրենք օրական 5000 դրամի եկամուտ էին ունենում, հիմա՝ 1000-1500 դրամի:
«Հլը 14 ժամ քշեք, տեսեք, 1000 դրամով կարողանո՞ւմ եք տուն պահել»,- դժգոհում էին վարորդները:
NEWS.am-ի թղթակիցը հաղորդում է, որ Անդրանիկի արձանի մոտ ակցիայի պատճառով խցանում է առաջացել: Ոստիկանները փորձում են կարգավորել երթեւեկությունը: Գործադուլ անող վարորդները կանգնեցնում են երթուղային գազելներն ու վարորդներին համոզում միանալ իրենց գործադուլին: Բողոքի ակցիային միանում են ոչ միայն վարորդները, այլեւ ուղեւորները, որոնք առաջարկում են բողոքելնաեւ համընդհանուր թանկացումների դեմ:
Վարորդները վճռական են տրամադրված. Նրանք չեն դադարեցնի գործադուլը, մինչեւ չկատարվի իրենց պահանջը: