Հայաստանի Կենտրոնական բանկը պետք է սառեցնի գյուղատնտեսական վարկերը, հատկապես արտարժույթով վարկերը: Այս մասին, այսօր՝ դեկտեմբերի 17-ին, մամուլի ասուլիսի ժամանակ նշել է Հայաստանի ագրարային գյուղացիական միության նախագահ Հրաչյա Բերբերյանը:
Նրա խոսքով՝ հենց դրանում է «աքիլեսյան գարշապարը»: «Այսօր առավոտյան ես խնդիրը քննարկել եմ գյուղատնտեսության նախարար Սերգո Կարապետյանի հետ: Եվ իմ, եւ նրա անունից կոչ եմ անում սառեցնել այդ վարկերը, քանի որ գյուղացին հայտնվել է անելանելի վիճակում: Դիմում եմ Ազգային ժողովին, թող հանձնաժողովի միջոցով ուսումնասիրեն, թե ուր է գնում արտարժույթը Հայաստանից»,-ասել է Բերբերյանը:
Նա հիշեցրել է, որ օրինակ երեկ ԿԲ-ն 4 մլն դոլար է վաճառել: «Ո՞ւր են գանում այդ փողերը, ո՞ր երկիր: Ի՞նչ ընկերություններ են Հայաստանից դուրս բերում այդ փողերը: Գուցե այն ընկերությունները, որոնք այսօր աշխատում են Հայաստանում տարբեր դրոշների ներքո, փորձում են երկրից դո՞ւրս բերել արտարժույթը»,-ընդգծել է Բերբերյանը: