Եթե առաջիկա ամիսներին փոխարժեքի աճի միտումները պահպանվեն ու «Գազպրոմ Արմենիա» ընկերությունը շարունակի այդ մասով վնասներ արձանագրել, ապա իրականացված մոնիտորինգի արդյունքում կկայացվի որոշում՝ դիմելու Հանրային ծառայությունները կարգավորող հանձնաժողով՝ սակագնի վերանայման հարցով: Այս մասին NEWS.am-ի թղթակցի հետ զրույցում ասաց «Գազպրոմ Արմենիա» ընկերության մամուլի խոսնակ Շուշան Սարդարյանը:
«Ընկերության մասնագետների կողմից ամենօրյա մոնիթորինգ է իրականացվում իրավիճակի հետ կապված: Եթե առաջիկա ամիսներին փոխարժեքի աճի միտումները պահպանվեն ու ընկերությունը շարունակի այդ մասով վնասներ արձանագրել, ապա մոնիթորինգի արդյունքներով համապատասխան որոշում կկայացվի՝ դիմելու Հանրային ծառայությունները կարգավորող հանձնաժողով՝ սակագնի վերանայման հետ կապված»,-ասաց Շուշան Սարդարյանը՝ հավելելով, որ գործող կարգի հիմքերով՝ ընկերությունը իրավունք ունի սակագնի հարցով դիմելու կարգավորող մարմնին՝ հաշվի առնելով նաեւ ԱՄՆ դոլարի նկատմամբ դրամի տատանումները:
Նշենք, որ ներկրված գազի դիմաց մատակարար ընկերությանը «Գազպրոմ Արմենիան» վճարումները կատարում է դոլարով՝ սահմանի վրա 1000 խորանարդ մետրի համար վճարելով 189 դոլար:
