Առանձին ապրանքների գների թռիչքաձեւ բարձրացումը, անգամ, եթե դրանք սպառողական զամբյուղում ելակետային են, դեռ չի նշանակում քառատրոփ ինֆլյացիա: Այդ մասին այսօր՝ դեկտեմբերի 17-ին, մամուլի ասուլիսի ժամանակ հայտարարեց Կենտրոնական բանկի նախագահ Արթուր Ջավադյանը: Նրա խոսքով՝ չի կարելի որպես հիմք ընդունել առանձին ապրանքներ. դրանց հավասարակշռում են այլ ապրանքները:
«Այո, կա ալյուր եւ շաքարավազ, սակայն ինֆլյացիան հաշվարկվում է ապրանքների շատ ավելի լայն շրջանակով, թեեւ իհարկե, ըստ կարեւորության տարբեր տեսակարար կշիռներով: Սակայն վերցրեք նույնպես կարեւոր տավարի միսը: Այստեղ լուրջ փոփոխություններ եղե՞լ են: Իսկ մի շարք ապրաքների գծով նկատելի է գների անկում», - նկատեց Ջավադյանը՝ «մոռանալով» խոզի մսի գնի մասին:
Նա հիշեցրեց, որ 2014թ. նոյեմբերին 12 ամսյա ինֆլյացիան (2013թ. նոյեմբերի նկատմամբ) կազմել է 2,6%, եւ ԿԲ-ի սպասումները չեն փոխվել: Այս տարվա վերջին եւ 2015թ. ինֆլյացիան կմնա 4 +/- 1,5% նպատակային միջանցքի սահմաններում:
Հիշեցնենք, որ բազմաթիվ ապրանքների գները՝ սերուցքային, բուսական յուղ, շաքարավազ եւ շատ այլ ապրանքներ, վերջին շաբաթվա ընթացքում խանութներում թանկացել են 10-20%-ով: