«Մաքսային կարգավորման մասին» ՀՀ օրենքի նախագծում բավականին անորոշ է եւ չկարգավորված Հայաստանի Հանրապետություն ներմուծվող ապրանքների մաքսային արժեքների որոշման հարցը: Այս մասին այսօր՝ դեկտեմբերի 17-ին, խորհրդարանում օրինագծի քննարկման ժամանակ ասաց Ազգային ժողովի ՀՀԿ խմբակցության ղեկավար Վահրամ Բաղդասարյանը:
Վահրամ Բաղդասարյանի խոսքով՝ օրենքով սահմանվում են ՀՀ-ից տարհանվող ապրանքների արժեքների կարգավորման կանոնները, սակայն ներմուծման մասին ամեն ինչ հստակ ասված չէ:
«Լուրջ քննարկում պետք է անել, որ բաց-եր չունենանք: Ի՞նչ է տեղի ունենում այս օրենքի ընդունման դեպքում. փաստորեն եթե ապրանքները ներմուծվել են, ասում ենք՝ գնացեք եւ խորհրդակցեք մաքսային մարմինների հետ: Պետք է կանոնակարգել, թե ինչ ձեւով պետք է խորհրդակցել: Այսինքն, մենք Ազգային ժողովին եւ կառավարությանը դնում ենք մի կողմ եւ մեծ լիազորություններ ենք տալիս մաքսային մարմիններին: Սակայն պետք չէ այսքան լիազորություններ տալ մաքսային մարմիններին»,- ասաց ՀՀԿ-ական պատգամավորը:
Վահրամ Բաղդասարյանը կարծում է, որ այս օրինագծով խնդիրներ կառաջանան նաեւ Սահմանադրության հետ: Նա կոչ արեց օրենքն այնպես կարգավորել, որ «մութ անկյուններ» չմնան: