Արտյոմ Կարապետյանի՝ («Շեկո») սպանության համար 17 տարվա ազատազրկման դատապարտված՝ Գյումրիի նախկին քաղաքապետ Վարդան Ղուկասյանի եղբորորդու՝ Վահե Ղուկասյանի փաստաբան Հայկ Ալումյանը դիմել է Վճռաբեկ դատարան: Այս մասին NEWS.am-ի թղթակցին հայտնեց Հայկ Ալումյանը:
Նրանք պահանջում են բեկանել Վերաքննիչ դատարանի որոշումը՝ առաջին ատյանի վճիռը անփոփոխ թողնելու մասով: Առայժմ հայտնի չէ՝ Վճռաբեկ դատարանը վարույթ ընդունել է դիմումը, թե ոչ, դա պարզ կլինի ամիսներից:
Հիշեցնենք, որ 2013թ. ապրիլի 23-ին Գյումրիի Շիրակացի 54բ շենքի մոտից հրազենային վնասվածքներով հիվանդանոց էին տեղափոխվել «Քավոր Հարութը» եւ «Շեկոն», վերջինս հիվանդանոցում մահացել էր: Ապրիլի 24-ին ոստիկանության Գյումրիի բաժնում Գյումրիի նախկին քաղաքապետ Վարդան Ղուկասյանի եղբորորդին՝ 24-ամյա Վահե Ղուկասյանը, խոստովանել էր, որ նշված հանցագործությունը կատարել է ինքը:
Շիրակի մարզի ընդհանուր իրավասության առաջին ատյանի դատարանը Վահե Ղուկասյանին դատապարտել է 17 տարվա ազատազրկման, փաստաբանը վճիռը բողոքարկել է Վերաքննիչ քրեական դատարանում, որն այն անփոփոխ է թողել:
