Հունգարիայի սուպերմարկետները կիրակի օրերին չեն աշխատի: Համապատասխան որոշումը դեկտեմբերի 17-ին հաստատել է երկրի խորհրդարանը, հայտնում է «Ռոսիյսկայա գազետան»:
Երկրի վարչապետ Վիկտոր Օրբանը տվյալ օրենքն ընդունելը հիմնավորել է նրանով, որ հենց կիրակի են հունգարացիները խանութներ գնում եւ դրա վրա ծախսում օրվա մեծ մասը: Սակայն Օրբանը պնդում է, որ դրա փոխարեն Հունգարիայի բնակիչները պետք է ավելի շատ ժամանակ անցկացնեն ընտանիքի հետ:
Խոշոր առեւտրի ցանցերի տերերն արդեն արտահայտել են իրենց դժգոհությունը: Փորձագետները հաշվել են, որ սուպերմարկետներում աշխատաժամերի կրճատումը կդառնա խանութներում վաճառքի եւ եկամուտների նվազման պատճառ: Արդյունքում առեւտրի ցանցերը ստիպված կլինեն կրճատել աշխատակիցների թիվը: Դա այն դեպքում, երբ Հունգարիայում գործազրկության մակարդակը բավական բարձր է, հատկապես՝ երիտասարդության շրջանում:
