Շիրակի մարզկենտրոն Գյուրմիրում ալյուրի մեծածախ վաճառք չեն իրականացնում, պատճառաբանելով, որ չեն կողմնորոշվում, թե ինչ գնով վաճառեն այն: Իրավիճակը նույնը մնալու դեպքում ալյուրի վաճառքով զբաղվողները եւ հացի փռերի սեփականատերերը սպառնում են գործադուլ սկսել:

«Մենք դոլարով ենք առնում ալյուրը: Արդեն 3-րդ օրն է՝ չգիտեմ՝ ինչ գնով վաճառել: Նոյեմբերին 50 կգ ալյուրը արժեր 13-14 հազար դրամ: Երեք օր առաջ 17 հազար դրամ է եղել, իսկ այսօր էլ չգիտենք՝ ինչքան կլինի: Սպասենք, տեսնենք՝ ինչ է լինելու վերջը»,- NEWS.am-ի հետ զրույցում ասաց ալյուրի մեծածախ առեւտրով զբաղվողներից մեկը, որը խնդրեց իր անունը չհրապարակել:

Գյումրիում նույնպես ապրանքների գները փոփոխվում են ժամ առ ժամ՝ անակնկալի բերելով մարդկանց:

Խանութներում հացը նախորդ օրվա համեմատ թանկացել է 20-30 դրամով՝ 140-ից դառնալով 170 դրամ:

Շաքարավազի մեկ կիլոգրամի գինը վերջին օրերին աճելով՝ հասել է 500 դրամի: Հնդկաձավարի մեկ կգ-ը 4 օրվա ընթացքում 500-ից դառել է 700 դրամ, իսկ բրինձը՝ 470: