Եթե Հայաստանում գործող ռուսական խոշոր բանկերը դոլար են արտահանել, նշանակում է՝ բավականին լուրջ ճգնաժամ է եւ փլուզումներ են սպասվում: Այս մասին NEWS.am-ի թղթակցի հետ զրույցում ասաց Ազգային ժողովի ՀՀԿ խմբակցության պատգամավոր, գործարար Աշոտ Աղաբաբյանը՝ անդրադառնալով դոլար-դրամ վայրիվերումներին:
«Հայ գործարարներից շատ հազվադեպ մարդիկ կան, որոնք վնասներ չեն կրի, խոսքը դոլարի գոտի արտահանողների մասին է, իսկ մնացած բոլոր գործարարներն էլ մեծ կորուստներ են կրում, եւ սա կուրսի երկրաշարժ եմ համարում եւ չեմ կարող ասել՝ ինչպիսին կլինեն հետեւանքները: Կարծում եմ, որ եթե մեր բանկերը դոլար չեն արտահանել, որովհետեւ ռուսական մեծ մոնոպոլիաներ կան, բնականաբար, շատ կարճ ժամանակամիջոցում կարելի է վիճակը փրկել: Հակառակ դեպքում բավականին լուրջ կրիզիս է լինելու, բավականին լուրջ փլուզումներ»,- ասաց պատգամավորը:
Ծանր իրավիճակից դուրս գալու համար Աշոտ Աղաբաբյանը միայն մեկ ելք է տեսնում. մարդիկ աշխատավարձ պետք է ստանան դոլարի փոխարժեքով, որն ըստ պատգամավորի՝ պարզապես անհնարին եւ ոչ մի երկրում նման բան տեղի չի ունենում:
«Արտաքին պարտքը պետք է ավելանա, դոլարներ պիտի խնդրենք, ներարկում պիտի անենք մեր բանկերին, բայց սա կլինի արտաքին պարտքերի ձեռքբերման արդյունքում»,- ավելացրեց գործարարը:
Նշենք, որ այսօր արդեն դոլարի փոխարժեքը սկսել է իջնել, դրամն արժեւորվում է:
