Երեւանում տրանսպորտի սակագինը պետք է կազմի առնվազն 300 դրամ, սակայն «գծատերերը» չեն պահանջում, որ այն ամբողջությամբ վճարի ուղեւորը, այլ որ 200 դրամը փոխհատուցի քաղաքապետարանը: Այս մասին այսօր՝ դեկտեմբերի 18-ին, լրագրողների հետ զրույցում ասաց փոխադրողների միության նախագահ Հրանտ Եղիազարյանը:
Նա հիշեցրեց, որ դեռ 2013թ.-ի դեկտեմբերին Հայաստան հրավիրված մասնագետը հաշվարկել եւ հայտնել էր, որ սակագինը պետք է լինի 252 դրամ, իսկ այսօր արդեն գազի թանկացումը ցույց է տալիս, որ ուղեվարձը պետք է պարտադիր դառնա 300 դրամից ոչ պակաս:
«Հարցը պետք է լուծել քաղաքակիրթ ճանապարհով, գումարի մի մասը պետք է իշխանությունը վճարի, մյուս մասը՝ ուղեւորները, այսինքն առնվազն 200 դրամը պետք է կառավարությունը սուբսիդավորի»,- ասաց Հրանտ Եղիազարյանը:
Ուղեւորափոխադրող ընկերությունները բազմիցս դիմել են քաղաքապետարանին, սակայն նրանք ոչ միայն չեն պատասխանում, այլեւ պահանջում են շարունակել փոխադրումները:
Նշենք, որ այսօր վաղ առավոտից Երեւանի տարբեր վարչական շրջանները սպասարկող երթուղայինների վարորդները դուրս են եկել փողոց եւ պահանջում են վերանայել գազի սակագինը, հակառակ դեպքում իրենք կշարունակեն գործադուլը: