Ադրբեջանում թյուրիմացաբար կարծում են, որ հայկական կողմերի հասցեին մերկապարանոց մեղադրանքներով հանդես գալով կարող են ձերբազատվել վանդալիզմը պետական քաղաքականության աստիճանի հասցրած երկրի համբավից: Այս մասին ի պատասխան NEWS.am-ի հարցման պատասխանել են ԼՂՀ ԱԳՆ-ից: Հարցումը վերաբերում էր Ադրբեջանի արտգործնախարարի՝ ԼՂՀ-ում ադրբեջանական մշակութային հուշարձանների ոչնչացման մասին հայտարարություններին:
«Ադրբեջանի իշխանություններն իրենց երկրում հայկական պատմամշակութային ժառանգության ցանկացած հետքերի ոչնչացմանն ուղղված գործողություններով վաղուց արդեն Ադրբեջանը դասել են ահաբեկչական կազմակերպությունների շարքում, որոնք չեն խորշում համաշխարհային մշակութային ժառանգության հուշարձանները ոչնչացնելուց: Դրա վառ ապացույցն էր 1998-2005թթ. Նախիջեւանում հայկական հազարավոր խաչքարերի ոչնչացումը՝ ադրբեջանական ղեկավարության անմիջական հրահանգով», - նշել են ԱԳՆ-ի մամուլի ծառայությունից:
Նշենք, որ խաչքարերի զանգվածային ոչնչացումը Հին Ջուղայում՝ Նախիջեւանում, սկսվել էր 1998 թ. եւ շարունակվել մինչեւ 2005 թ., երբ ադրբեջանցի զինվորները բուլդոզերներով հին հայկական գերեզմանոցի ընդարձակ տարածքը հավասարեցրել էին հողին: Նախքան ավերվելը Ջուղայի հայկական գերեզմանատունը աշխարհում պահպանված խաչքարերի ամենախոշոր միջնադարյան գերեզմանոցն էր, որտեղ կար 9-17 դդ. շուրջ 10 000 հայկական խաչքար: Խաչքարեր կերտելու արվեստն ընդգրկված է ՅՈՒՆԵՍԿՕ-ի ոչ նյութական մշակութային ժառանգության ցանկում:
