Գազի գինը այսօր՝ դեկտեմբերի 18-ին, առավոտից կարգավորվել է՝ 230-ից դառնալով 200 դրամ: Այս մասին այսօր՝ դեկտեմբերի 18-ին, լրագրողներին ասաց ՀՀ վարչապետ Հովիկ Աբրահամյանը։
«Գազի կայաններում վերականգնվել է 200 դրամ լիցքավորումը, այնպես որ այսօր առավոտյան այդ հարցը կարգավորվել է, երեկ 230 էր դառել, այսօր առավոտվանից 200 է»,-ասաց Հովիկ Աբրահամյանը:
Հիշեցնենք, որ արդեն երկրորդ օրն է, ինչ մայրաքաղաքի երթուղիները սպասարկող վարորդները բողոքի ակցիաներ եւ գործադուլներ են անում՝ պահանջելով կամ գազի գնի իջեցում կամ ուղեվարձի բարձրացում, քանի որ դրամի արժեզրկման պայմաններում գազի թանկացման պատճառով զգալիորեն նվազել են վարորդների եկամուտները:
Բողոքող վարորդներից Ներսես Դանիելյանը NEWS.am-ի հետ զրույցում ասաց, որ իրենց պահանջը ոչ թե գազի սակագինը 200, այլ 170 դրամ դարձնելն է:
«30 դրամով բան չի փոխվում, մենք պահանջում ենք, որ վերադառնա 170 դրամը՝ նախկին գինը: Եթե այսօրվա ժողովին մեր պահանջը չբավարարվի, բոլորով գնալու ենք Հանրապետության հրապարակ»,- ասաց Ներսես Դանիելյանը: