Դեկտեմբերի 18-ին ԼՂՀ մշակույթի եւ երիտասարդության պալատում, տեղի ունեցավ ծառայողական խորհրդակցություն` նվիրված 2014թ. ամառային զորակոչի արդյունքների ամփոփմանը եւ 2014թ. ձմեռային զորակոչի խնդիրների քննարկմանը:
ԼՂՀ ՊՆ մամուլի ծառայությունից հայտնում են, թե խորհրդակցությանը ներկա էին ՊԲ բարձրաստիճան սպայակազմը, ԼՂՀ կառավարության անդամներ, ուժային կառույցների եւ տեղական ինքնակառավարման մարմինների ղեկավարներ:
Խորհրդակցությունը բացեց եւ ներածական խոսքով հանդես եկավ ԼՂՀ ՊՆ, ՊԲ հրամանատար, գեներալ-լեյտենանտ Մովսես Հակոբյանը: Նախարարի ներածական խոսքին հաջորդեց հանրապետության գլխավոր զինկոմի զեկույցը, որում մանրակրկիտ վերլուծության ենթարկվեցին ընթացիկ տարվա ամառային զորակոչի արդյունքները, շեշտվեցին արձանագրված ձեռքբերումներն ու թերացումները, իսկ այնուհետեւ ներկայացվեց գալիք տարվա ձմեռային զորակոչի նախապատրաստման ուղղությամբ իրականացված աշխատանքների համալիրը:
Նախորդ եւ սպասվող զորակոչին վերաբերող հարցերի շրջանակն էր ընդգրկում նաեւ ՊԲ կազմզորահավաքային բաժնի պետի զեկույցը: Բավարար գնահատելով ամառային զորակոչի ընթացքում կատարված աշխատանքների արդյունքները, ելույթ ունեցողը խորհրդակցության մասնակիցների ուշադրությանը ներկայացրեց նաեւ զորամասերում եւ ստորաբաժանումներում` նոր համալրման ընդունման ուղղությամբ իրականացված ու իրականացվող նախապատրաստական գործընթացների ընդհանուր վիճակը:
Խորհրդակցությունն ավարտվեց ԼՂՀ պաշտպանության նախարարի ամփոփիչ խոսքով: Օրակարգային հարցերի շուրջ իր նկատառումները ներկայացնելով խորհրդակցության մասնակիցներին՝ հանրապետության պաշտպանության նախարարը մեկ անգամ եւս ներկաների ուշադրությունը հրավիրեց նախատեսվող գործընթացների ճիշտ եւ անթերի կազմակերպման վրա եւ դրանց կատարման ուղղությամբ տվեց համապատասխան հանձնարարականներ:
