Արտադրանքը Ռուսաստանի Դաշնություն արտահանող հայկական ընկերությունները լուրջ վնասներ են կրել ռուբլու արժեզրկումից, ավելին չեն կողմնորոշվում, թե հաջորդ տարվա պայմանագրերն ինչ փոխարժեքով կնքել: Այս մասին NEWS.am-ի թղթակցի հետ զրույցում ասաց «Գորիսի Գամմա» բաց բաժնետիրական ընկերության գլխավոր տնօրեն Տիգրան Կարապետյանը:
«Կոնկրետ մեր իրացման ծավալների 50%-ը Ռուսաստան է գնում, մեր պայմանագիրը կնքվել էր 2014թ.-ի հունվարի մեկով, երբ ռուբլու կուրսը 11,5 դրամ էր, այսօր արդեն կուրսը 8-9 դրամ է: Սա նշանակում է, որ 1 մլն ռուբլու դեպքում կորցնում ենք 3-4 մլն դրամ: Մեր բախտը բերեց այնքանով, որ մեր գործարքների մեծ մասը եղան հենց տարվա սկզբին, այսինքն երբ ռուբլու կուրսը կայուն էր: Մենք գումարներն այդ ժամանակ ենք ստացել: Հիմա էլ խնդիր ունենք հաջորդ տարվա պայմանագրի հետ կապված, չգիտենք՝ ինչ անել»,- ասաց Տիգրան Կարապետյանը:
Գործարարի խոսքով՝ այսօր ռուսական ռուբլիով գործարք անող մարդիկ ավելի շատ են տուժել, քան դոլարով արտասահմանից ապրանք ներմուծողները:
«Մեր վնասները սարսափելի են: Դրամի արժեզրկումը քիչ ավելի բացասական ազդեցություն կունենար մեզ վրա, եթե գոնե ռուբլին կայուն լիներ: Ուզենք, թե չուզենք՝ մեր տնետսության փոխկապակցվածությունն այնքան մեծ է ռուսականից, որ այնտեղի բացասական ազդեցությունը մեղմելու համար Կենտրոնական բանկն այսքան ռեսուրսներ չունի: Պարզապես պետք չէր թողնել, որ ռուբլին այդքան արժեզրկվեր»,- ավելացրեց նա:
Նշենք, որ փոխարժեքների տատանումներից շատ գործարարներ են տուժել, հատկապես արտասահմանյան շուկա արտահանող ընկերությունները: