Բելառուսի խորհրդարանի ստորին պալատը նախատեսում է ուրբաթ քննարկել ԵՏՄ-ին Հայաստանի անդամակցության պայմանագրի վավերացումը, հայտնում է «ՌԻԱ Նովոստին»:
Նախատեսվում է, որ պատգամավորները պայմանագիրը կքննարկեն դեկտեմբերի 19-ի նիստում:
Փաստաթուղթը նախատեսում է, որ Հայաստանը կմիանա ԵՏՄ-ի պայմանագրին, ինչպես նաեւ ՄՄ շրջանակում ստորագրված միջազգային այլ փաստաթղթերի:
Նախատեսվում է, որ կքննարկեն ԱՀԿ անդամ հանդիսացող Հայաստանի սակագնային պարտավորությունները, ԵՏՄ փոփոխված միասնական մաքսատուրքը:
Վավերացման ենթակա պայմանագիրը նախատեսում է անցումային ժամանակահատվածներ՝ մեկից մինչեւ ութ տարի Հայաստանի՝ ԵՏՄ-ից տարբերվող մաքսատուրքերը համապատասխանեցնելու համար, 12-60 ամիս՝ ՄՄ-ի տեխնիկական կանոնադրությունը կիրառելու համար, 3 տարի՝ մտավոր սեփականության օբյեկտները պահպանելու եւ պաշտպանելու իրավունքի համար: Անցումային ժամանակահատվածներում ԵՏՄ-ի անդամները իրավունք ունեն իրենց տարածքում Հայաստանից ներմուծվող ապրանքների հատուկ կարգ սահմանել:
Բացի դրանից, պայմանագիրը սահմանում է ապրանքների տեղափոխման առանձնահատկությունները արտասահմանյան պետությունների տարածքով՝ մաքսային տարանցմամբ, նույնականացման հատուկ միջոցներ օգտագործելով, եւ կարգավորում է սանիտարական, անասանաբուժական-սանիտարական եւ կարանտինային միջոցների հետ կապված հարցերը:
ԵՏՄ-ի մասին պայմանագիրը Ռուսաստանը, Բելառուսը եւ Ղազախստանն ստորագրել են այս տարվա մայիսի 29-ին Աստանայում, փաստաթուղթն ուժի մեջ է մտնում 2015 թ. հունվարի 1-ից: