Ամերիկյան Forbes ֆինանսատնտեսական ամսագրի կողմից հրապարակված «Բիզնեսի համար լավագույն երկրները – 2014» (Best countries for business – 2014) վարկանիշային աղյուսակում, որտեղ բիզնեսի վարման տարբեր ցուցանիշներով գնահատվել է 146 երկիր, Հայաստանը զբաղեցրել է 56-րդ տեղը: Այս տարի 146 երկրների շարքում Դանիան վերադարձել է առաջին հորիզոնական, որը 2008-2010թթ-ին անընդմեջ առաջատարն էր: Լավագույն տասնյակում են ընդգրկվել նաեւ Հոնկոնգը, Նոր Զելանդիան, Իռլանդիան, Շվեդիան, Կանադան, Նորվեգիան, Սինգապուրը, Շվեյցարիան եւ Ֆինլանդիան:
Վարկանշում Վրաստանը 47-րդն է, Թուրքիան՝ 50-րդը, իսկ Ադրբեջանը՝ 60-րդը: Միեւնույն ժամանակ Ուկրաինան զբաղեցրել է 88-րդ տեղը, իսկ Ռուսաստանը՝ 91-րդը:
«Մի քանի տարվա երկնիշ տնտեսական աճից հետո Հայաստանը բախվեց լուրջ տնտեսական անկման հետ, երբ ՀՆԱ-ն 2009թ. ավելի քան 14% անկում արձանագրեց՝ չնայած բազմակողմ հաստատություններից ստացված մեծ վարկերի: Շինարարական հատվածում եւ հատկապես Ռուսաստանում աշխատող հարազատներից դրամական փոխանցումների կտրուկ նվազեցումը հանգեցրին կտրուկ անկմանը: Տնտեսությունը սկսեց վերականգնվել 2010թ.՝ արձանագրելով 2,1%-ոց աճ եւ դրանից հետո երեք տարվա ընթացքում՝ ավելի արագ տեմպերով», - նշում է պարբերականը:
«Forbes»-ը հավելում է, որ Հայաստանի կառավարությունը վերջին տարիներին հարկային եւ մաքսային վարչարարություններում որոշակի բարեփոխումներ է իրականացրել: «Սակայն կոռուպցիայի դեմ պայքարի միջոցառումները անարդյունավետ են եղել եւ տնտեսական անկումը հանգեցրել է հարկային մուտքերի կտրուկ իջեցմանը, ինչպես նաեւ կառավարությանը ստիպել խոշոր վարկային փաթեթներ ընդունել Ռուսաստանից, ԱՄՀ-ից եւ այլ միջազգային ֆինանսական ինստիտուտներից», - ասվում ամսագրում:
Պարբերականը նաեւ նշում է, թե իրավիճակը բարելավելու համար Հայաստանն ինչ պետք է անի: «Հայաստանը պետք է լրացուցիչ տնտեսական բարեփոխումներ իրականացնի եւ ամրապնդի օրենքի գերակայությունը՝ տնտեսական աճը վերականգնելու, տնտեսական մրցունակությունը բարելավելու եւ զբաղվածությունը մեծացնելու նպատակով՝ հատկապես հաշվի առնելով իր երկու հարեւանների՝ Թուրքիայի եւ Ադրբեջանի կողմից երկրի տնտեսական մեկուսացումը», - գրում է «Forbes»-ը: