Վրաստանի նախկին նախագահ Միխայիլ Սահակաշվիլին հայտարարել է, որ Վրաստանի ԱԳն-ն չեղյալ է համարել իր նախագահական անձնագիրը: Այս մասին նա ասել է Ստրասբուրգում, վրացի լրագրողների հետ զրույցում:
«Ես ավիաընկերությունում տեղեկացա, որ իմ նախագահական անձնագիրը չեղյալ է համարվել, թեեւ այն ինձ հասնում է օրենքով: Օդանավակայանի աշխատակիցները պարզապես ժպտացին»,-ասել է Սահակաշվիլին:
Նշենք, որ եւ Միխայիլ Սահակաշվիլին, եւ Վրաստանի գործող նախագահ Գեորգի Մարգվելաշվիլին ներկա են եղել Եվրախորհրդարանում Վրաստանի ԵՄ ասոցացման համաձայնագրի վավերացման ժամանակ: Սահակաշվիլիին Ստրասբուրգ է հրավիրել ԵԺԿ-ն:
Հիշեցնենք, որ Սահակաշվիլին Վրաստանը լքել է 2013-ի նոյեմբերին, նախքան նոր նախագահ Մարգվելաշվիլիի երդմնակալության արարողությունը: Մինչ օրս նա չի վերադարձել հայրենիք:
Վրաստանի գլխավոր դատախազությունը հեռակա կարգով Միխայիլ Սահակաշվիլիին մեղադրանք է առաջադրել 4 քրեական գործերով (պետական միջոցների յուրացման, 2007-ի նոյեմբերի 7-ին ցույցը ցրելիս ուժի կիրառման, Վրաստանի խորհրդարանի պատգամավոր Վալերի Գելաշվիլիին ծեծի ենթարկելու եւ «Վրաստանի միավորված բանկի» աշխատակից Սանդրո Գիրգվլիանիի սպանության համար):
Սահակաշվիլիի նկատմամբ Վրաստանում հետախուզում է հայտարարվել: