Երեւանի քաղաքապետի տեղակալ Դավիթ Օհանյանը ներկայացրել է առողջապահության, առեւտրի եւ սպասարկումների, տեխնոլոգիաների, արտաքին ձեւավորման եւ գովազդի ոլորտներում Երեւանի քաղաքապետարանի 2014 թվականի տարեկան ամփոփ արդյունքները: Այս մասին NEWS.am-ը տեղեկացավ Երեւանի քաղաքապետարանից:
Ըստ այդմ, առողջապահական ծրագրերի իրականացման համար 2014թ. համայնքային բյուջեից հատկացվել է շուրջ 146 միլիոն դրամ, որը 50 տոկոսով ավելի է նախորդ տարվա ցուցանիշից: Պետպատվերի շրջանակում վիրահատվել է 13465 քաղաքացի: Քաղաքապետի տեղակալը ներկայացրել է նաեւ քաղաքապետարանի ենթակայության բուժհաստատություններում իրականացված նորոգման եւ ջեռուցման համակարգերի անցկացման աշխատանքների արդյունքները: Կարեւորվել է բժշկական սարքավորումների ձեռքբերման ծրագիրը. ձեռք են բերվել 14 անուն ժամանակակից բուժսարքավորումներ: Ավանդական դարձած «Ձեզ համար, կանայք» եւ «Երեւանյան ամառ» խորագրով առողջապահական ակցիաների շրջանակում անվճար բուժօգնություն է ստացել 27517 քաղաքացի:
Առեւտրի եւ սպասարկումների ոլորտի վերաբերյալ նշվել է, որ բացօթյա ապօրինի առեւտրի արգելման ու կանխարգելման նպատակով տարեսկզբից կազմակերպվել են ամենօրյա շրջայցեր մայրաքաղաքի բոլոր վարչական շրջաններում։ Դեկտեմբերի 15-ի դրությամբ՝ բացօթյա ապօրինի առեւտուր իրականացնելու համար կազմվել է 339 արձանագրություն: Աշխատանքներ են իրականացվել նաեւ ժամը 24.00-ից հետո աշխատող օբյեկտների գործունեությունը կանոնակարգելու ուղղությամբ: Հաշվի առնելով բնակչության բողոքները եւ արձանագրված խախտումները՝ 2014թ. ընթացքում 34 գիշերային ակումբների, բարերի եւ կարաոկե-ակումբների գործունեության թույլտվություն չի տրվել:
Երեւան քաղաքի արտաքին ձեւավորման եւ գովազդի ոլորտում 2014 թվականին կատարված աշխատանքների շրջանակում մասնավոր կազմակերպությունների հետ համագործակցության արդյունքում կառուցվել է վերգետնյա 3 անցում: Հյուսիսային պողոտայի հիմնանորոգման ծրագրի շրջանակում իրականացվել է 5 մլն դոլարի ներդրումային ծրագիր. շուրջ 3 անգամ ավելացել է կանաչ տարածքը, ամբողջությամբ փոխարինվել է պողոտայի կահավորանքը։
2014թ. շարունակվել է գովազդային կրիչների արդիականացման ծրագիրը: Կենտրոն վարչական շրջանում ապամոնտաժված 106 հնաոճ մեծ եւ միջին չափերի գովազդային վահանակների փոխարեն տեղադրվել են քաղաքային չափերի գովազդային արդիական միջոցներ։ 950 վահանակ ապամոնտաժվել է շենք-շինությունների վրա տնտեսվարողների կողմից տեղադրված «Գովազդի մասին » ՀՀ օրենքին հակասելու պատճառով: Խախտումների վերաբերյալ կազմվել է 219 արձանագրություն: Շարունակվել են կամարանցումների վերանորոգման, գունազարդման եւ լուսավորման, ինչպես նաեւ շենքերի ճակատային գունավորման աշխատանքները, տեղադրվել են նոր նստարաններ եւ աղբամաններ: