Թուրքիայի «Սեպտեմբերի 9-ը» համալսարանի պատմության դասախոս Թյուրքան Բաշյիղիթը ուսանողներից պահանջել է Հայոց ցեղասպանությունը ժխտող աշխատանքներով ներկայանալ քննությանը։
Թուրքական Radikal-ի փոխանցմամբ՝ «Սեպտեմբերի 9-ը» համալսարանի պատմության դասախոս Թյուրքան Բաշյիղիթի՝ ուսանողներին տված քննական հանձնարարությունը մեծ արձագանք է գտել սոցկայքերում։ Թուրք դասախոսը պահանջել էր, որ ուսանողները քննության մտնեն Թուրքիայի կողմից Հայոց ցեղասպանությունը հերքող փաստաթղթերի հիման վրա արված աշխատանքներով։
Ուսանողներն այս հայտարարությունը լուսանկարել եւ տարածել են սոցկայքերում, որից հետո բազմաթիվ օգտատերեր աղմուկ են բարձրացրել եւ իրենց բողոքը հայտնել երեւույթի նկատմամբ։ Օգտատերերի միջեւ քննարկումներից մեկի ժամանակ հարցրել են թուրք պրոֆեսորին, թե ուսանողներից մեկը քննության ներկայանա Հայոց ցեղասպանությունը հաստատող աշխատանքով, այդ դեպքում նա ինչ է անելո՞ւ։
Թյուրքան Բաշյիղիթը արդարացել է՝ պնդելով, թե ինքը ակադեմիական հանձնարարություն է տվել։