Ղազախստանի խորհրդարանն իր նիստում ընդունել է ԵՏՄ-ին Հայաստանի անդամակցության պայմանագրի վավերացման մասին օրենքը: Փաստաթուղթն ուղարկվել է երկրի նախագահին՝ ստորագրության համար, որից հետո ուժի մեջ կմտնի:
«Պայմանագրի ուժի մեջ մտնելու պահից Հայաստանը դառնում է ԵՏՄ անդամ եւ իր վրա պարտավորություններ է վերցնում, որոնք նախատեսված են այդ պայմանագրով: Օրինագծի ընդունումը թույլ կտա ԵՏՄ անդամ երկրներին պայմաններ ստեղծել հետագա տնտեսական ինտեգրման համար՝ ուղղված այդ երկրների բնակչության կենսամակարդակի բարձրացմանը»,-նշվում է Ղազախստանի Սենատի տնտեսական քաղաքականության, ինովացիոն զարգացման եւ ձեռնարկատիրության հարցերի հանձնաժողովի եզրակացության մեջ:
Ղազախստանի ազգային էկոնոմիկայի նախարարության տեղեկատվության համաձայն, Հայաստանի հետ ապրանքաշրջանառությունը կազմում է շուրջ 7,7 մլն դոլար: Միաժամանակ երկկողմ համագործակցության հեռանկար կա մետալուրգիայի, գյուղատնտեսության եւ շինարարության ոլորտներում:
