Ֆիոլետովո գյուղի բնակիչների վրա ճնշումներ են գործադրում, որպեսզի նրանք ստորագրեն Ֆիոլետովոյի ոսկու հանքավայրի շահագործումը թույլատրող փաստաթղթի տակ, հաղորդում է «ԷկոԼուր»-ը: Նման ահազանգ տարածվեց Facebook սոցիալական ցանցում: Ըստ այդմ, նշվում է, որ հանքավայրը գյուղի վերջին տներից գտնվում է 300 մետր հեռավորության վրա:
Հիշեցնենք, որ Ֆիոլետովոյի ոսկու հանքավայրի շահագործումը նախատեսում է իրականացնել «Գրեյդ Ռեդմետ» ՍՊԸ-ն: Նախագիծը դեռեւս գտնվում է բնապահպանական փորձաքննության փուլում: Սույն թվականի դեկտեմբերի 23-ին` ժամը 12.00-ին, Երեւան քաղաքի Սունդուկյան 23/100 հասցեում, տեղի կունենան նախագծի վերաբերյալ լիազորված անձի մասնագիտական եզրակացության, հասարակական եւ ազդակիր համայնքի ղեկավարի կարծիքների հասարակական լսումները:
Ըստ Ֆիոլետովոյի գյուղապետարանի պաշտոնական կայքի` նախագծի վերաբերյալ հանրային լսումներ նախատեսված են եղել սույն թվականի նոյեմբերի 25-ին եւ դեկտեմբերի 16-ին:
«Գրեյդ Ռեդմետ» ՍՊԸ-ն մտադիր է Ֆիոլետովոյի ոսկու հանքավայրը շահագործել բաց եղանակով: Նախագծի համաձայն` Ֆիոլետովոյի ոսկու հանքաերեւակումը գտնվում է Ֆիոլետովո համայնքի վարչական տարածքում` գյուղից դեպի հարավ-արեւելք 500 մ, Աղստեւ գետի աջ ափին գտնվող` ծովի մակարդակից 1693.1 մ բացարձակ նիշ ունեցող բլրակի մերձակայքում: Հիմնական ջրային արտերիան Աղստեւ գետն է իր բազմաթիվ վտակներով: Հանքավայրում ոսկու պարունակությունը տատանվում է 2,5 – 5,5 գ/տ սահմաններում: Բացահանքը զբաղեցնելու է 5.2 հա տարածք: Լցակույտը տեղակայվելու է բացահանքից 1.3 կմ հեռավորության վրա, տարողունակությունը` մոտ 3 մլն.մ3, ընդհանուր մակերեսը` մոտ 4 հա:
Հանքավայրը շահագործվելու է 5 տարի, տարեկան արդյունահանվելու է 37,000 տոննա հանքաքար: Հանքաքարը տեղափոխվելու է կամ Արմանիսի, կամ Արարատի հարստացուցիչ ֆաբրիկա:
Ըստ նախագծի` հանքավայրի ազդեցության գոտում են գտնվում երեք համայնքներ` Ֆիոլոտովո, (հանքավայրից հեռավորությունը` 2.7 կմ), Մարգահովիտ՝ (հանքավայրից հեռավորությունը` 11.1 կմ), Լերմոնտովո՝ (1 հանքավայրից հեռավորությունը` 7 կմ):
Նշենք, որ «Գրեյդ Ռեդմետ» ՍՊԸ-ի անունը մամուլում կապվում է ՀՀ բնապահպանության նախկին նախարար, ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանի անվան հետ:
