ՌԴ արտգործնախարար Սերգեյ Լավրովը ԱՄՆ պետքարտուղար Ջոն Քերրիի հետ հեռախոսազրույցում նշել է, որ ԱՄՆ նախագահ Բարաք Օբամայի ստորագրած «Ուկրաինայի ազատության մասին» օրենքը, որում հակառուսական նոր պատժամիջացներ են նախատեսված, ընդունակ է երկար ժամանակով խափանել Վաշինգտոնի եւ Մոսկվայի նորմալ փոխգործակցությունը, հայտնել են ՌԴ ԱԳՆ-ից:
Հեռախոսազրույցը կայացել է հինգշաբթի՝ ամերիկյան կողմի նախաձեռնությամբ, փոխանցում է «ՌԻԱ Նովոստին»:
Քննարկվել են պաղետինա-իսրայելյան կարգավորման, ուկրաինական ճգնաժամի հարցեր:
2014թ. Ուկրաինայի ազատությանն աջակցելու մասին (Ukraine Freedom Support Act 2014) օրինագիծն Օբաման ստորագրել է երեկ՝ հինգշաբթի օրը: Փաստաթղթում նշվում է, որ այն ուղղված է Ռուսաստանի դեմ պատժամիջոցներին եւ Ուկրաինային հավելյալ օգնություն հատկացնելուն»: Օբաման միաժամանակ հայտարարել էր, որ թեեւ ՌԴ-ի դեմ նոր օրենքը ստորագրել է, սակայն առայժմ տրամադրված չէ պատժամիջոցներ կիրառելու: