Գլխավոր դատախազությունից ի պատասխան բողոքի՝ գրությամբ հայտնել են, որ Շենգավիթի քննչականի բաժնի պետի դեմ գործը կարճվել է: Այս մասին NEWS.am-ի թղթակցի հետ զրույցում ասաց քննչականի պետի փաստաբան Երեմ Սարգսյանը:
Նա նշեց, որ որպես քրեական գործը կարճելու պատճառաբանություն՝ գրությամբ նշվել է հանցակազի բացակայությունը: Իսկ թե ինչպես է գնահատում փաստաբանը գործը հարուցելը, կարճելը, նորից վերսկսելը, նորից կարճելը, արդյոք սա Քննչական կոմիտեի ղեկավար Աղվան Հովսեփյանի եւ Գլխավոր դատախազ Գեւորգ Կոստանյանի հակամարտության արդյունքը չէ, Երեմ Սարգսյանն այսպես պատասխանեց. «Ես հակամարտությանը ականատես չեմ եղել, իրավական հարթությունում նշեմ, որ այս քրեական գործի հարուցումից ակնհայտ էր, որ այն դատական հեռանկար չի կարող ունենալ, քանի որ բովանդակության ձեւակերպումից ակնհայտ էր, որ այստեղ հանցագործության մասին խոսք լինել չի կարող»,-ասաց փաստաբանը:
Հիշեցնենք, որ սկզբից դատախազությունը հարուցել էր մի շարք քննիչների դեմ գործեր, այնուհետեւ ՀՔԾ-ում դրանք կարճվել էին, հետո նորից դատախազությունը վերացրել էր կարճման որոշումը եւ ահա որոշ ժամանակ անց որոշեց կարճել դրանք:
