Երեւանի մետրոպոլիտենի նախկին աշխատողներ Գագիկ Գալստյանի, Սեւակ Հովհաննիսյանի ու Անդրանիկ Գեւորգյանի 2014թ. փետրվարի 11-ին պարտադիր կուտակային կենսաթոշակային համակարգի դեմ կազմակերպված ցույցին մասնակցելու պատճառով աշխատանքից զրկվելու գործի քննությունը նշանակվել է 2015թ. հունվարի 19-ին` ժամը 16:00-ին: Այս մասին NEWS.am-ը տեղեկացավ «Ընդդեմ իրավական կամայականության» ՀԿ-ից:
Հիշեցնենք, որ երեք աշխատողներ` Սեւակ Հովհաննիսյանը, Գագիկ Գալստյանը ու Անդրանիկ Գեւորգյանը դիմել են դատարան` աշխատանքից ազատման հրամաններն անվավեր ճանաչելու, նախկին աշխատանքում վերականգնելու եւ հարկադիր պարապուրդի ամբողջ ժամանակահատվածի համար միջին աշխատավարձի չափով վճարում կատարելու պահանջով: Որպես նրանց աշխատանքից ազատման հիմք է նշվել ՀՀ ԱՕ 113-րդ հոդվածի 6-րդ կետը` աշխատողի նկատմամբ վստահության կորուստը:
Դեկտեմբերի 16-ին նշված գործով Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Սիմիզար Հովսեփյանի կողմից պետք է կայացվեր նշված գործով վճիռը: Իսկ աշխատակիցների շահերը դատարանում ներկայացնում է «Ընդդեմ իրավական կամայականության» ՀԿ-ի փաստաբան` Քրիստինա Գեւորգյանը:
Դատարանը, «անհրաժեշտ համարելով լրացուցիչ հետազոտել ապացույցները կամ շարունակել գործի համար նշանակություն ունեցող հանգամանքների պարզումը», վերսկսել է գործի քննությունը: Գործի քննությունը վերսկսելը դատարանը պատճառաբանել է նրանով, որ իբր հարկ կա անդրադառնալ պատասխանող կազմակերպության կողմից որպես ապացույց ներկայացված ամենօրյա կատարվող աշխատանքների վերաբերյալ մատյանների հետազոտությանը:
«Գտնում ենք` գործի քննության վերսկսումը կրում է ձեւական բնույթ, քանի որ նախ ներկայացված մատյանները չեն կարող համարվել հիմնավոր ապացույց` ՀՀ ԱՕ 113-րդ հոդվածի 6-րդ կետով սահմանված աշխատանքից ազատման հիմք, երկրորդ` դատարանը թե´ նախնական դատաքննության, թե´ բուն դատաքննության փուլերում /թվով 8 նիստերով/ մանրամասն ուսումնասիրել է նշված մատյանները, ստացել է մանրակրկիտ պարզաբանումներ պատասխանողի ներկայացուցիչներից` կապված մատյանների բովանդակության, լրացման կարգի, մատյանները վարողների եւ քննվող գործին այդ մատյանների վերաբերելիության հետ»,-ասված է կազմակերպության հայտարարության մեջ: