ՀՀ կենտրոնական բանկը թողարկել է Մայր Աթոռ Սուրբ Էջմիածնում պահվող Սուրբ Գրիգոր Լուսավորչի աջին նվիրված արծաթե հուշադրամ:
Հայաստանի ԿԲ մամուլի ծառայությունից հայտնում են, որ հուշադրամի դիմերեսին պատկերված է ՀՀ զինանշանը: Զինանշանից ներքեւ հուշադրամի անվանական արժեքն է` «1000 դրամ dram» եւ «REPUBLIC OF ARMENIA» մակագրությունը, իսկ աջ եզրագծով ուղղահայաց մակագրված է «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ»:
Հուշադրամի դարձերեսին պատկերված են Սուրբ Գրիգոր Լուսավորիչի պատկերը (անհայտ հայ նկարիչ, 18-րդ դար) եւ նրա մասունքներով Աջը: Վերեւի եզրագծով «ՍՈՒՐԲ ԷՋՄԻԱԾԻՆ HOLY ETCHMIADZIN» մակագրություններն են եւ «Է» տառը:
Ներքեւի եզրագծով հուշադրամի թողարկման տարեթիվն է` «2014, ՌՆԿԳ» եւ նախշ: Ձախ եզրագծերով ուղղահայաց մակագրված են «ՍՈՒՐԲ ԳՐԻԳՈՐ ԼՈՒՍԱՎՈՐՉԻ ԱՋԸ» եւ «THE RIGHT HAND OF SAINT GREGORY THE ILLUMINATOR»:
Հուշադրամի անվանական արժեքը 1000 դրամ է, մետաղը եւ հարգը` արծաթ 9250, քաշը` 25 գ, չափը` 27x47 մմ, որակը` պրուֆ, դրամաշուրթը` ատամնավոր, տպաքանակը մինչեւ 2500 հատ: Հուշադրամը հատվել է Գերմանիայի «Մայեր» դրամահատարանում: