Ազատագրված Քարվաճառի շրջանում հուլիսին ադրբեջանցի դիվերսանտների կողմից դաժանաբար սպանված 16-ամյա Սմբատ Ցականյանի հայրը՝ Մեխակ Ցականյանը, դատարանից պահանջում է, որ ադրբեջանցի երկու դիվերսանտներին էլ «խիստ պատժեն»: NEWS.am-ի թղթակցի հետ զրույցում գործով տուժողի իրավահաջորդ հանդիսացող Մեխակ Ցականյանը նշեց, որ դատավարությունն արդար է ընթացել եւ իրենք ստացել են հուզող բոլոր հարցերի պատասխանները:
«Մեղադրող կողմի պահանջած պատժաչափի հետ լիովին համաձայն եմ, նրանց երկուսին էլ պետք է խիստ դատել: Չնայած որդուս սպանել է Ասկերովը, բայց Գուլիեւին էլ պիտի խիստ պատժեն»,- ասաց Մեխակ Ցականյանը:
Մեխակ Ցականյանի խոսքով՝ ամբողջությամբ բացահայտվել է իր որդու սպանությունը:
Նշենք, որ մեղադրող Կարեն Գաբրիելյանը Ասկերովի համար պահանջել է ցմահ, իսկ Գուլիեւի համար 22 տարվա ազատազրկում: http://news.am/arm/news/244932.html
Հիշեցնենք, որ Դիլհամ Ասկերովին մեղադրանք է առաջադրվել Լեռնային Ղարաբաղի քրեական օրենսգրքի 7, իսկ նույն երկրի քաղաքացի Շահբազ Գուլիեւին ՝ 5 հոդվածների հատկանիշներով։ Նրանք մեղադրվում են ազգային ատելության շարժառիթներով մարդուն առեւանգելով սպանելու, կազմակերպված խմբի կողմից անչափահասի նկատմամբ զենքի գործադրմամբ բռնություն գործադրելու, լրտեսության, Ղարաբաղի պետական սահմանը կազմակերպված խմբի կողմից հատելու, հրազեն եւ ռազմամթերք կրելու մեջ։ Դիլհամ Ասկերովին նաեւ կազմակերպված խմբի կողմից ազգային ատելության շարժառիթով երկու անձանց սպանության փորձի մեղադրանք է առաջադրվել։