Թանկացման եւ դրամի արժեզրկման դեմ պայքարելու համար պետք է այսօր ստեղծել ազգային ճակատ։ Այս մասին այսօր՝ դեկտեմբերի 19-ին, լրագրողների հետ զրույցում ասաց ԱԻՄ առաջնորդ Պարույր Հայրիկյանը, որը կառավարության մոտ մասնակցում էր թանկացման եւ դրամի արժեզրկման դեմ բողոքի ակցիային։
«Այսօր այս նախաձեռնությանը նայելով, մեկ անգամ եւս համոզվեցի, որ երեխայական մոտեցումներով չես կարող հարցեր լուծել, քաղաքացիական նախաձեռնությունը շատ գեղեցիկ բան է, բայց հարցեր լուծելու համար մարդիկ համախմբվում են կազմակերպված, պատասխանատու միավորների մեջ, նրանք, ովքեր համախմբվում են, ունեն անցյալ, ունեն ներկա եւ ունեն ապագա։ Սա շատ ողջունելի է, բայց փոփոխությունների համար կազմակերպված պայքար է պետք, պետք է ստեղծվի քաղաքակրթական դաշինք »,-ասաց Պարույր Հայրիկյանը։
Նրա խոսքով՝ ժողովրդին խաբում են՝ ասելով, որ թանկացումները համաշխարհային ճգնաժամի հետեւանք են, սակայն իրականում դա այդպես չէ. «Մեր ժողովրդին խաբում են, ասում են, որ համաշխարհային ճգնաժամ գոյություն ունի, եթե համաշխարհային ճգնաժամ լիներ, ապա դոլարն էլ կարժեզրկվեր, եվրոն էլ կարժեզրկվեր, սա մեծ սուտ է, որ փորձում են մեզ պարտադրել։ Այս իշխանություններից ցավոք սրտի միայն մեկ բան ենք պահանջում, հեռացեք, դուք մեր իշխանությունը չեք»։
Անդրադառնալով ԵՏՄ-ին միանալու ՀՀ նախագահի հիմնավորմանը՝ Պարույր Հայրկյանն ասաց, որ այն քաղաքակրթական հիմքերի վրա պետք էր լիներ, ոչ թե ազգային անվտանգության։
«Սերժ Սարգսյանը Թբիլիսիում հայտարարեց, որ ԵՏՄ-ին միանալուց մենք քաղաքակրթական որոշում չենք կայացրել, մենք ազգային անվտանգությամբ ենք առաջնորդվել, բայց եթե դու չես հասկանում, որ ազգային անվտանգության հիմքերի հիմքում քաղաքակրթական ճիշտ ընտրությունն է, նշանակում է՝ դու ճիշտ քո տեղում չես»,- ասաց Հայրիկյանը։