Ադրբեջանի գործողությունները սպառնալիք են ԱՄՆ-ի հետ հարաբերությունների համար: Այս մասին «Ազատություն» ռադիոյին հայտնել է ԱՄՆ պետքարտուղարի աշխատանքի, ժողովրդավարության եւ մարդու իրավունքների գծով օգնական Թոմ Մալինովսկին, փոխանցում է contact.az-ը:
Ադրբեջանում մարդու իրավունքների մասին խոսելով՝ Մալինովսկին ասել է, որ այնտեղ, ինչպես եւ ցանկացած այլ երկրում, ոչ ոք չպետք է հետապնդումների ենթարկվի լրագրողական գործունեության կամ ազատ արտահայտվելու համար:
«Մենք միանշանակ Ադրբեջանի իշխանություններին իրազեկել ենք, որ այդ մարդկանց ազատումն ենք ցանկանում, այդ թվում՝ «Ազադլըղ» ռադիոյի լրագրող Խադիջա Իսմայիլովայի»:
Ի պատասխան հարցին՝ ձեռնարկվում են արդյոք գործուն քայլեր այդ մարդկանց ազատման համար, Մալինովսկին ասել է, որ այդ հարցը քննարկվում է ամենաբարձր մակարդակով: «Նրանք պետք է հասկանան, որ քաղաքացիական հասարակության խեղդումը սպառնալիքի տակ է դնում ադրբեջանա-ամերիկյան հարաբերությունները»,- ասել է Մալինովսկին:
Հարցին՝ «խոր մտահոգությունից» բացի ինչ հավելյալ միջոցներ կձեռնարկվեն Ադրբեջանի իշխանությունների դեմ, եւ էլ ինչ պետք է կատարվի, որ հայտարարությունները հստակ գործողությունների վերածվեն, Մալինովսկին որոշակի պատասխան չի տվել:
«Առայժմ կարող եմ ասել միայն, որ 20 տարվա ընթացքում ԱՄՆ-ն լավ հարաբերություններ է ունեցել Ադրբեջանի հետ: Երբեմն տարբեր հարցերի, ներառյալ՝ մարդու իրավունքների շուրջ տարակարծություններ են եղել: Սակայն մենք միշտ հասել ենք հարցերի լուծման, այդ պատճառով մեզ համար դժվար է հասկանալ Ադրբեջանում վերջին ամիսներին կատարվող դեպքերը: Այդ գործողությունները կասկածի տակ են դնում մեր հարաբերությունները: Ադրբեջանի իշխանությունների հետ խորհրդակցությունների ժամանակ մենք կփորձենք սա հասկացնել նրանց»:
