Ինեկոբանկը հերքել է լրատվամիջոցներում տարածված տեղեկատվությունը Ինեկոբանկ ՓԲԸ-ի գործադիր տնօրեն Ավետիս Բալոյանի հրաժարականի վերաբերյալ:
«Ինեկոբանկ» ՓԲԸ Կորպորատիվ զարգացման ծառայության ղեկավար Ալլա Պավլովայի հաղորդագրության մեջ ասվում է. «Պաշտոնապես տեղեկացնում ենք, որ նշված տեղեկատվությունը չի համապատասխանում իրականությանը:
Պարոն Ավետիս Բալոյանը հանդիսանում է «Ինեկոբանկ» ՓԲԸ հիմնադիր եւ խոշոր բաժնետեր, ում պատկանում է բանկի կապիտալի 35 %-ը: Հիմնադրման օրվանից արդեն մոտ 20 տարի է Ա. Բալոյանը բանկում զբաղեցնում է ղեկավար պաշտոն, այդ թվում տարբեր ժամանակներ եղել է խորհրդի նախագահ կամ գործադիր տնօրեն»:
Նշենք, որ «Հայկական ժամանակ» թերթն իր այսօրվա համարում գրել էր, թե «իր տեղեկություններով, հրաժարականներ են ներկայացրել «Արցախբանկի» վարչության նախագահ Կամո Ներսիսյանը, «Ինեկոբանկի» գործադիր տնօրեն Ավետիս Բալոյանը, «Առեքսիմբանկի» գլխավոր տնօրեն Արսեն Խանդկարյանը եւ «ԲՏԱ բանկի» գործադիր տնօրեն Նուր Բակբերգենովը»: «Թվարկվածներից առաջին երկուսը՝ «Արցախբանկի» եւ «Ինեկոբանկի» ղեկավարները, մեր տեղեկություններով, հրաժարականի դիմումները ներկայացրել են դեկտեմբերի 17-ին»,- գրել էր թերթը: