Մենք ինքներս էլ ցանկանում ենք, որ բենզինի գները նվազեն: Այս մասին NEWS.am-ի թղթակցի հետ զրույցում ասաց «CPS» ընկերության սեփականատեր Աշոտ Սալազարյանը:
Նա նշեց, որ բենզինի եւ դիզվառելիքի գները Հովիկ Աբրահամյանի ուշադրության կենտրոնում է, վարչապետի մոտ քննարկում է եղել, առաջարկվել է հաշվարկներ անել, որի արդյունքում էլ արդեն այսօրվանից սկսած բենզնի եւ դիզվառելիքի գները կնվազեն 10 դրամով:
Աշոտ Սալազարյանն ասաց, որ եթե հետագայում էլ կարգավորվի դոլար-դրամ հարաբերությունները, գները կշարունակեն իջնել: «Մեզ ձեռնտու է, որ բենզինի գները իջնեն, քանի որ ունենք մրցակից գազ, ինչքան բենզինը էժան լինի, այնքան սպառման ծավալները կավելանան: Այսօր գազ-բենզին սպառման հարաբերակցությունը կազմում է 75-25 է»,-ասաց նա: Հայաստանում բենզինի եւ դիզվառելիքի ոլորտում գերիշխող դիրք ունեցող «CPS» ընկերության սեփականատերն ասաց, որ ինչքան փոխարժեքը կայունանա, դրամը արժեւորվի, այնքան գները կիջնեն: Աշոտ Սալազարյանի խոսքով՝ եթե մեկ դոլարը արժենա 410-420 դրամ, հնարավոր է բենզինի գինը իջնի 40-50 դրամով:
Թե ինչքան կպահպանվի բենզինի եւ դիզվառելիքի նոր՝ իջեցված գինը, ընկերության սեփակաատերն ասաց, որ այն հաստատապես կպահպանվի մինչեւ Ամանոր ու հետագայում էլ թանկացումներ չեն սպասվում, եթե իհարկե դոլարի փոխարժեքը չդառնա 570 կամ 580:
