Աբխազական երկաթուղու վերականգնման հարցը գտնվում է քննարկման փուլում: Այդ մասին այսօր՝ դեկտեմբերի 20-ին, մամուլի ասուլիսի ժամանակ հայտարարեց ՀՀԿ-ական պատգամավոր, ԱԺ Տնտեսական հարցերով մշտական հանձնաժողովի նախագահ Վարդան Այվազյանը:
Նրա խոսքով՝ Վրաստանը նոր ինտեգրացիոն նախագծերի կողմնակից է, սակայն ոչ իր սեփական տարածքային ամբողջականության հաշվին: Այվազյանը հիշեցրեց, որ շատ հայտարարություններ են արվել, որտեղ ռուսական կողմն իր պատրաստակամություն է հայտնել Աբխազիայի միջոցով երկաթուղային հաղորդակցության վերականգնման առիթով, սակայն վրացական կողմը այդքան էլ չի ողջունել այդ հայտարարությունները:
«Հայաստանն, իհարկե, շահագրգռված է երկաթուղու վերականգնման հարցում: Սակայն այստեղ կա քաղաքական խնդիր, եւ այդ հարցում Հայաստանը կարող է կատարել միայն միջնորդական առաքելություն», - ընդգծեց պատգամավորը: Նա հավելեց, որ երկաթուղու վերականգնումը պետք է տեղի է ունենա Ռուսաստանի եւ Վրաստանի փոխադարձ համաձայնությամբ: «Աբխազական երկաթուղու վերականգնման հարցում քաղաքական բաղադրիչ կա, այդ հարցն անհրաժեշտ է տեղափոխել տնտեսական դաշտ», - եզրափակեց Վարդան Այվազյանը: