Ինտեգրացիոն տարբեր միավորումներին Հայաստանի եւ Վրաստանի մասնակցությունը բացարձակապես միմյանց դեմ չի աշխատում, այլ՝ միմյանց օգտին եւ համալրելով միմյանց: Այս մասին դեկտեմբերի 20-ի մամուլի ասուլիսում հայտարարել է ԱԺ ՀՀԿ-ական պատգամավոր, ԱԺ տնտեսական հարցերով հանձնաժողովի նախագահ Վարդան Այվազյանը:
«Հայաստանի եւ Վրաստանի քաղաքական ղեկավարության շնորհիվ տնտեսական ինտեգրման տարբեր ուղղությունները երկու պետություններին հավելյալ դիվիդենտներ եւ օգուտ են բերում», - ընդգծել է պատգամավորը: Եթե ԵՄ-ի հետ խոր եւ համապարփակ ազատ առեւտրի գոտու պայմանագիրը ենթադրում է ազատ սահմաններ եւ ապրանքաշրջանառություն, շարունակել է Այվազյանը, ապա եվրասիական տնտեսական գոտին հստակ սահմանում էր իր առաջնահերթությունները, եւ Հայաստան-Վրաստան հարաբերությունների շրջանակում որեւէ բացասական դրսեւորում չկա, քանի որ Հայաստանի եւ Վրաստանի միջեւ ստորագրված ազատ առեւտրի պայմանագիրը գործում է մինչ օրս:
Հիշեցնենք, հոկտեմբերի 10-ին Մինսկում Հայաստանը ԵՏՄ-ին անդամակցելու պայմանագիր էր ստորագրել, իսկ Վրաստանը հունիսի 27-ին ստորագրել էր Եվրամիության հետ ասոցացման համաձայնագիր:
