Գյումրիում հոկտեմբերի 29-ի երեկոյան 25-ամյա Արտյոմ Ադանալյանի սպանությունից հետո վերջինիս մտերիմների կողմից ծեծի ենթարկված Գյումրիի շտապ բուժօգնության ծառայության աշխատակիցների գործով նախաքննությունը շարունակվում է: Այս մասին NEWS.am-ի թղթակցի հետ զրույցում ասաց Շիրակի մարզպետարանի առողջապահության վարչության պետ Հովհաննես Հովհաննիսյանը:
«Մեքենայի վնասը՝ մոտ 200-300 հազար դրամը, փոխհատուցվել է, մեքենան արդեն վերանորոգվել է եւ շահագործվում է: Գիտեմ, որ վնասը փոխհատուցել է հենց մեքենան վնասած անձինք»,- ասաց Հովհաննես Հովհաննիսյանը:
Նշենք, որ շտապօգնության բուժաշխատողներն ավելի վաղ NEWS.am-ին պատմել էին, որ իրենց դիմավորած արյունաշաղախ դեպքով երիտասարդը նախ դրսում ծեծել էր վարորդին, հետո ձեռքին երկաթյա կտորով հարվածել էր մեքենային:
«Մենք մի կերպ ներս գնացինք։ Տղան մեջքի վրա պառկած էր, բժիշկը մոտեցավ, զննեց ու պարզվեց՝ մահացած է, բայց հայրն ու այդ ագրեսիվ երիտասարդը ստիպում էին մեզ, որ փրկենք, վերակենդանացնենք տղային, բժիշկն էլ ստիպված, որ մեզ ավելի վնաս չտան, վերակենդանացման միջոցառումներ էր անում, ես էլ ներարկիչն էի պատրաստում, ու էդ պահին այդ երիտասարդը արյունոտ դեմքով հետեւանց խփեց դեմքիս»,- ասել էր տուժած բուժքույր Լամարա Սարգսյանը:
Շիրակի մարզպետարանի առողջապահության վարչության պետ Հովհաննես Հովհաննիսյանն էլ մեզ հետ զրույցում նշել էր, որ Ադանալյանների տնակից կանչը առավելագույնս արագ է սպասարկվել. մեքենան մեկ րոպեից տեղում է եղել։