Երեւանի կենդանաբանական այգին այս տարի եւս կզարդարվի տարբեր իրերի վերօգտագործումից երեխաների պատրաստած տոնածառներով: Արդեն երրորդ տարին անցկացվող՝ բնապահպանական «Ապրող ծառ» տոն-մրցույթին այսօր՝ դեկտեմբերի 20-ին, մասնակցեցին 5-15 տարեկան մի քանի տասնյակ երեխաներ՝ տարբեր կրթահամալիրներից:
Երեւանի կենդանաբանական այգու տնօրեն Ռուբեն Խաչատրյանի խոսքով՝ մրցույթի նպատակը երեխաների մեջ շրջապատի նկատմամբ ուշադրությունը մեծացնելն է:
«Հարյուրավոր երեխաներ այսօր փորձում են վերամշակել այն կենցաղային աղբերը, որոնք որպես կանոն թափվում են: Այս ամեն ինչը երեխաներին օգնում է ավելի ուշադիր, զգայուն լինել շրջապատի նկատմամբ: Սյս կերպ կնվազեն այն խնդրները, որ ունենք մեր շրջակա միջավայրում»,- NEWS.am-ի հետ զրույցում ասաց Ռուբեն Խաչատրյանը:
Երեխաների պատրաստածները մրցեցին լավագույն էկո-տոնածառ, էկո-ձնեմարդ եւ լավագույն Սուրբ Ծննդյան մսուր անվանակարգերում: Դրանք մինչեւ տոների ավարտը կզարդարեն կենդանաբանական այգին:
«Ապրող ծառ» էկո-մրցույթի շրջանակում Վայրի բնության եւ մշակութային արժեքների պահպանման հիմնադրամն այս տարի եւս «ապրող» եղեւնիների վարձակալություն եւ վաճառք է անցկացրել: