ԱՄՆ-ում սեւամորթ տղամարդը գնդակահարել է երկու ոստիկանի: Իրավապահները դա համարել են վրեժ աֆրոամերիկացի դեռահասի սպանության համար, որին գնդակահարել էին ոստիկանները:
Ինչպես հաղորդում է «ՌԻԱ նովոստին», սեւամորթ տղամարդը գնդակահարել է ոստիկաններ Վենցզյան Լուիին եւ Ռաֆայել Ռամոսին Բրուքլինում, որից հետո փորձել է փախուստի դիմել մետրոյով: Տեսնելով դիմացից եկող ոստիօկաններին, նա ինքնասպան է եղել:
«Սա մահապատիժ էր»,-New York Post թերթին ասել է Նյու Յորքի իրավապահ մարմինների աղբյուրը:
Պարբերականը նշում է, որ սպանությունից 3 ժամ առաջ ենթադրյալ հանցագործը Instagram սոցիալական ցանցում ատրճանակի լուսանկար է տեղադրել եւ գրել. «Նրանք սպանել են մերոնցից մեկին... Եկեք սպանենք նրանցից երկուսին... Հնարավոր է, սա իմ վերջին գրառումն է»:
ԱՄՆ նախագահ Բարաք Օբաման դատապարտել է Նյու Յորքում երկու ոստիկանների սպանությունը՝ նշելով, որ հանցագործներին արդարացում չկա, ասված է Սպիտակ Տան հայտարարությունում:
ԱՄՆ-ում վերջին շաբաթներին չեն դադարում բողոքի ակցիաները՝ կապված ոստիկանների կողմից չհիմնավորված բռնությունների արդյունքում զոհերի հետ: Ամերիկյան հասարակությունում հուզումների պատճառ է դարձել սեւամորթ Էրիք Գարների մահը, որի նկատմամբ ձերբակալման ժամանակ խեղդող հնարք էին կիրառել, ինչպես նաեւ Միսսուրի նահանգում ոստիկանների կողմից Մայքլ Բրաունի գնդակահարությունը: