Թբիլիսիում դեկտեմբերի 20-ի երեկոյան ծեծի է ենթարկվել Ռուսաստանի վրացիների միության նախագահ եւ «Եդինայա Ռոսիա» կուսակցության անդամ, ՌԴ-ում գործարարությամբ զբաղվող Միխայիլ Խուբուտիան: Դեպքը տեղի է ունեցել «Թավադուրի» ռեստորանի մոտ:
Վրացական լրատվամիջոցները հայտնում են, որ ականատեսների խոսքով, միջադեպին մասնակից են եղել ռեստորանի անվտանգության աշխատակիցները:
Խուբուտիան եղել է ընկերների հետ, դուրս է եկել փողոց եւ մոտեցել իր մեքենային, իսկ երբ վերադարձել է, նրան թույլ չեն տվել ռեստորան մտնել ու ծեծել են: Նրա դեմիքն կապտուկներ կան: Խուբուտիան արդեն ցուցմունք է տվել իրավապահներին:
«Գռուզիա Online»-ը նշում է, որ Խուբուտիան պուտինամետ գործիչ է: Նա ՌԴ նախագահին կից ազգամիջյան հարաբերությունների խորհրդի անդամ է:
Վրաստանի ՆԳՆ-ից հայտնում են, որ փաստի առթիվ հետաքննություն է սկսվել: