Սաուդյան Արաբիայի էներգետիկայի նախարար Ալի ալ-Նաիմին նավթի գների բարձրացում է կանխատեսել: Հանդես գալով Աբու Դաբիում էներգետիկայի հարցերով ֆորումում, նա վստահություն է հայտնել, որ նավթային շուկաները շուտով կվերականգնվեն գների անկումից հետո, իսկ ռեսուրսի արժեքը կբարձրանա:
Նավթի գների անկման պատճառներից մեկը Ալ-Նաիմին անվանել է «ՕՊԵԿ-ում չընդգրկված, նավթ արդյունահանող երկրների միջեւ ոչ բավարար փոխգործակցությունը, տեղեկատվության անբավարարությունն ու սպեկուլյանտների նենգ մոտիվացիան», հաղորդում է «Վեդոմոստին»:
Նախարարը նաեւ հավելել է, որ գների նվազումը չի ազդի Սաուդյան Արաբիայի եւ այլ արաբական երկրների տնտեսությունների վրա:
Նավթի գների անկման մեկ այլ պատճառ է նշել ԷՄԷ-ի էներգետիկայի նախարար Սհոյլ բեն Մոհամեդ Ֆարաջ Ֆարիս ալ-Մազուրին՝ հայտարարելով, որ գներն ընկել են «ՕՊԵԿ-ում չներառված երկրների կողմից նավթի անպատասխանատու արդյունահանման պատճառով»:
Հիշեցնենք, որ նավթի գինը կտրուկ սկսել է նվազել նոյեմբերի 27-ին Վիեննայում կայացած ՕՊԵԿ-ի գագաթաժողովից հետո: Նիստից հետո մասնակից երկրները որոշել են պահպանել նավթի արդյունահանման քվոտան օրական 30 մլն բարելի սահմաններում, մինչեւ կազմակերպության հաջորդ նիստը, որը կկայանա 2015-ի հունիսին;