Բելառուսի նախագահ Ալեքսանդր Լուկաշենկոն ժամանել է Կիեւ, որտեղ բանակցություններ կվարի Ուկրաինայի նախագահ Պյոտր Պորոշենկոյի հետ, հաղորդում են ուկրաինական լրատվամիջոցները:
Բելառուսի նախագահի մամուլի գրասենյակի փոխանցմամբ երկու երկրների ղեկավարները կքննարկեն բելառուսա-ուկրաինական օրակարգի արդիական հարցեր, ինչպես նաեւ միջազգային խնդիրներ: Ալեքսանդր Լուկաշենկոն ավելի վաղ հայտարարել էր, որ իր ուկրաինացի գործընկերը խնդրել է իրեն հանդիպել: «Ամենայն հավանականությամբ, կիրակի, մենք կհանդիպենք: Ուկրաինայի նախագահը երեկ զանգահարեց եւ խնդրեց, որ ինչ-որ կերպ հանդիպենք, զրուցենք որոշ հարցերի շուրջ: Ես էլ, իհարկե, ցանկություն հայտնեցի, որովհետեւ մենք զրուցելու բան ունենք այս իրավիճակում»,-հայտարարել է Լուկաշենկոն:
Նշենք, որ դեկտեմբերի 22-ին Կիեւում սպասում են նաեւ Ղազախստանի նախագահ Նուրսուլթան Նազարբաեւին:
Նազարբաեւի մամուլի ծառայությունը հայտնել է, որ երկրի նախագահը Կիեւում կլինի աշխատանքային մեկօրյա այցով, որը տեղի կունենա դեկտեմբերի 23-ին: Բացի այդ, Նազարբաեւը ՀԱՊԿ հավաքական անվտանգության խորհրդի նստաշրջանի շրջանակներում հանդիպում կունենա նաեւ ՌԴ նախագահ Վլադիմիր Պուտինի հետ: Այդ նստաշրջանին կմասնակցեն նաեւ Հայաստանի, Բելառուսի, Ղրղզստանի եւ Տաջիկստանի նախագահները: