Բելառուսի նախագահ Ալեքսանդր Լուկաշենկոն պատրաստ է մեկ օվա ընթացքում կատարել այն ամենը, ինչի մասին կխնդրի նրա ուկրաինացի գործընկեր Պյոտր Պորոշենկոն:
«Բելառուսից ինչ-որ բան պետք լինի՝ ասա, մենք մեկ օրում կանենք քեզ համար այն ամենը, ինչ խնդրես: Հրապարակայնորեն ասում եմ, ինչ խնդրել է Ուկրաինայի նախագահը, մենք միշտ արել ենք: Եվ այսուհետ էլ նույնն է լինելու»,- Լուկաշենկոյի խոսքերն է մեջբերում ԲԵԼՏԱ-ն:
«Ես ուզում եմ, որ Ուկրաինայում լավ լինի: Շատերը դա որպես խաղ են հասկանում: Գիտեմ, որ Դուք դա այդպես չեք ընկալում»,- հավելել է Բելառուսի նախագահը:
Նա նաեւ Պորոշենկոյին խնդրել է չխոսել Մինսկի պայմանավորվածություններում իր ներդրման մասին: «Դուք զանգահարեցիք ինձ. կազմակերպի՛ր, օգնի՛ր, մեր մարդիկ կգան, ներկայացուցիչներ կլինեն: Ես կազմակերպիչ եմ, այլ ոչ թե խաղաղարար եւ միջնորդ»,- ասել է Լուկաշենկոն:
Ուկրաինայի նախագահ Պյոտր Պորոշենկոն, իր հերթին, նշել է, որ հույս ունի վերականգնել Մինսկի պայմանավորվածությունների ինտենսիվությունը: Նա շնորհակալություն է հայտնել Բելառուսի նախագահին՝ եռակողմ շփման խմբի երկխոսության հնարավորության համար:
Խոսելով այսօր Կիեւում կայացած հանդիպման մասին, Պորոշենկոն նշել է, որ օրակարգը լայն է: Նրա խոսքով, «գոյություն ունեն բավական լուրջ մարտահրավերներ, որոնց հարկավոր է համակարգված պատասխաններ պատրաստել»: