Հայաստանի կառավարությունը շատ կօգներ իր թեթեւ արդյունաբերողներին՝ պահեստներ բացելով Ռուսաստանում: Այս մասին NEWS.am-ի թղթակցի հետ զրույցում հայտարարեց Հայաստանի թեթեւ արդյունաբերողների գործատուների միության համանախագահ Հովսեփ Պողոսյանը:
Ցուցահանդեսներին մասնակցությանն աջակցությունը լավ է, բայց դեռեւս բավարար չէ: Ըստ նրա, պոտենցիալ գործընկերը կցանկանա պահեստներ տեսնել, իսկ դրանցում՝ բավականաչափ ապրանք: Շուկայում նման գործողություններ պետք է կատարվեն առնվազն 1.5-2 տարի: «Միայն դրանից հետո կսկսեն աստիճանաբար ճանաչել ապրանքները»,- պարզաբանեց Պողոսյանը:
«Կառավարության հետ համատեղ քայլեր նախատեսում էինք ձեռնարկել դեռեւս մեկ տարի առաջ, բայց, ցավոք, այս տարին կորցրեցինք, այդ թվում՝ պետական ապարատի թույլ նախաձեռնողականության պատճառով»,- հավելեց նա:
Պետական աջակցությունը ոչ միշտ է հարկավոր, այլ հենց այդ 1.5-2 տարիներին, երբ վաճառքը դեռեւս չի ծածկի ծախսերը: «Պահեստներում մնացորդը նույնիսկ պետք է. թող պոտենցիալ գործընկերները տեսնեն, որ մեր ապրանքները չեն ավարտվում, իսկ դա նշանակում է, որ մեզ հետ կարելի է երկարաժամկետ պայմանագրեր կնքել»,- բացատրեց Հովսեփ Պողոսյանը:
Նշենք, որ թեթեւ արդյունաբերության զարգացման 2014-16 թվականների գործողությունների համաձայն, հայկական հագուստի եւ կոշիկի առաջխաղացման նպատակով արտահանման ընկերությունների ստեղծման համար առաջին տարվա ընթացքում 134 մլն դրամ է հարկավոր, երկրորդ տարում՝ 159 մլն: Պետության անհրաժեշտ համաֆինանսավորումն առաջին երկու տարիներին գնահատվել է 141 մլն դրամ (ընթացիկ փոխարժեքով՝ շուրջ 310 հազար դոլար):