Արազափի ջրամատակարարման համակարգը կառուցվել է հեռավոր 60-ականներին: Ցանցի երկարատեւ շահագործման հետեւանքով թուջե խողովակները շարքից դուրս են եկել, իսկ հնացած ենթակառուցվածքները հանգեցրել են մի շարք խնդիրների: Ջրի ցածր ճնշումը սահմանափակել է համակարգից օգտվելու` գյուղացիների հնարավորությունը: Ջրատար խողովակների մասնակի վերանորոգման աշխատանքներն այլեւս արդյունք չեն տալիս եւ ֆինանսական տեսանկյունից արդարացված չեն: Իսկ համայնքային բյուջեով աշխատանքներ իրականացնելն իրատեսական չէ:
Արազափի ջրամատակարարման ենթակառուցվածքների զարգացման նպատակով ՎիվաՍել-ՄՏՍ-ը, ԱՄՆ Միջազգային զարգացման գործակալությունը (ԱՄՆ ՄԶԳ) եւ Վայրի բնության եւ մշակութային արժեքների պահպանման հիմնադրամը (FPWC) սկսել են ծրագիր իրականացնել: 18,2կմ ջրագծի ներքին ցանցից արդեն իսկ 15կմ երկարությամբ նոր` գրեթե կորուստ չտվող պոլիէթիլենային ջրատար խողովակաշարն անցկացվել է: 90 %-ով ավարտվել են նաեւ հողային եւ ջրագծի մոնտաժման աշխատանքները:
Առաջիկայում կցանկապատվի պոմպակայանի սանիտարական գոտու տարածքը, կտեղադրվեն ջրաչափեր, որոնք կնպաստեն ջրի տնտեսմանն ու հաշվառմանը: կկատարվեն մասնակի այլ աշխատանքներ: Ակնկալվում է, որ նոր պոմպի եւ ջրաչափերի տեղադրման գործընթացից հետո համայնքի ջրամատակարարման ցանցը կբարելավվի, ջուրը սպառողներին կմատակարարվի հավասարաչափ եւ շուրջօրյա: Ծրագրի ֆինանսական աջակցությունը ստանձնած կազմակերպությունների եւ համայնքի համագործակցության արդյունքում հնարավոր կլինի արձանագրել ջրի եւ էլեկտրաէներգիայի խնայողություն:
Հիշեցնենք, որ եռակողմ համաձայնագրի շրջանակներում իրականացվող ծրագրի արդյունքում, եկող տարվա գարնանը խմելու ջրի խնդիրը լուծում կստանա Արմավիրի մարզի՝ Լուկաշին, Արազափ եւ Տավուշի մարզի՝ Բերքաբեր եւ Արծվաբերդ գյուղերում: Կողմերն այս ուղղությամբ միավորել են ջանքերը եւ հետեւում են իրականացվող աշխատանքների ընթացքին:
Ծրագրի արդյունքից օգտվելու է նշված չորս գյուղի մոտ 6800 բնակիչ: Այդ նպատակով ՎիվաՍել-ՄՏՍ-ը տրամադրել է 70 միլիոն, իսկ ԱՄՆ ՄԶԳ-ն՝ 60 միլիոն դրամ: